Home Politics PROME MINISTER PRESENTE NA APERTURA DI SUPERNOVA CAMP

PROME MINISTER PRESENTE NA APERTURA DI SUPERNOVA CAMP

SHARE

“Un Camp durante vakantie pa muchanan muhe por traha riba nan ‘self-esteem’ y prepara nan pa e Habilidadnan di siglo 21”

 

Prome Minister Evelyn Wever-Croes a asisti na e prome dia di Supernova Camp cu a cuminsa dialuna 4 di October, 2021, e siman di vakantie di scol di nos muchanan. Supernova Camp, bou iniciativa di FUTURA ta un camp organisa pa solamente mucha muhenan na unda lo traha riba nan ‘self-esteem’ y prepara nan pa e Habilidadnan di siglo 21. 

 

Manera ta conoci, den futuro lo bay tin hopi trabou disponibel den e vaknan technico manera ‘Science, Technology, Engineering and Mathematics (STEM) y p’esey ta importante pa nos muchanan muhe hoben tin conocemento riba e STEM vaknan aki. Hopi biaha e area di technologia ta un area mas gusta pa nos muchanan homber y p’esey ta importante pa inculca den e muchanan muhe jong e conocemento di tur loke ta technologia y innovacion. Di e manera aki por stimula e muchanan muhe pa scoge un trabou den e direccion aki, evitando asina di core e riesgo cu den futuro e trabounan aki lo wordo ocupa solamente pa hende homber perdiendo tur e avansenan cu nos generacionnan a logra den emancipacion di hende muhe.

 

Durante e camp aki e muchanan muhe lo cubri diferente topico. Riba e prome dia di camp a papia over di liderazgo y akinan nos Prome Minister tabata presente y a presencia e presentacion di e muchanan cu tawata basa riba nan ‘rolemodel’. Tambe lo cubri e topico di ‘Health and Wellness, Planning, Coding y VR gaming’. 

 

Prome Minister Evelyn Wever-Croes ta sumamente contento di mira cu un biaha mas FUTURA a logra di organisa e Innovation Camp, aunke no grandi y conisderando tur precaucion pa cu Covid pero dunando oportunidad na nos muchanan muhe hoben pa ta e miho version di nan mes. Premier ta gradici FUTURA pa e iniciativa aki un biaha mas y na cada mayor cu a permiti nan yiu di ta parti di e camp aki. 

 

“Pami como hende muhe ta hopi bunita pa mira cu e camp aki por a continua. Mi ta sigur cu pa fin di siman nos por mira bek riba un experiencia hopi bunita”, Prome Minister a termina bisando.