Home » Fiscal a exigi 3 aña di prison pa Jayson Margarita pa a abusa di un mucha menor di 16 aña

Fiscal a exigi 3 aña di prison pa Jayson Margarita pa a abusa di un mucha menor di 16 aña

by Admin
0 comment 65 views

ORANJESTAD – Awe mainta Corte di Husticia a trata e caso penal cu Ministerio Publico a cuminsa contra Jayson Margarita (39) di Curacao biba na Aruba.

Aruba Native por a compronde cu Jayson a bisa Hues cu el a enamora cu e mucha pero no tabatin relacion sexual cun’e. Fiscal si ta haya Jayson culpable y a exigi 42 luna di prison di cual 6 luna ta condicional.

Fiscal ta acusa Jayson cu entre September 2020 y Februari 2021, e tabatin relacion sexual cu un mucha muher A. kende tabata bou di 16 aña. Tambe Fiscal ta acusa Jayson cu den e mesun periodo el a mishi na partinan intimo di e mucha A.

Jayson a desmenti e acusacionnan. El a bisa Hues cu e mucha A. tabata traha practicamente henter dia cun’e. E mucha tabata traha den e gym y a bira un atleta di fitness y hasta instructor. Segun Jayson, e mucha tabata kier tin relacion cun’e y na dado momento el a enamora cun’e.

Segun Jayson, e sa cu A. ta menor di edad y cu e ta casa cu un yiu muher. El a bisa Hues cu el a palabra cu A. cu ora A. tin 18 aña, lo bay dicidi kico ta bay pasa.

Jayson a sigui bisa cu e mucha A. a wordo abusa pa su abuelo y su omo.

Hues a puntra pakico e mucha A. a declara contra Jayson. Segun Jayson, e mama y ruman muher grandi di A., tabata pone presion pa e declara contra dje, pa asina tapa loke a pasa cun’e cu su mesun abuela y su omo.

Hues a remarca cu apesar di loke Jayson ta bisa, A. ta keda mantene su declaracion di tabatin relacion enamoroso y sexual cu Jayson.

Fiscal a bisa Hues cu aki ta trata di un mucha di 15 aña, kende a bisa cu e tabatin relacion sexual voluntario cu Jayson. El a mustra cu dia 3 Februari 2021 e mama di A. a haci denuncia. El a bisa cu dia 2 Februari 2021 ora cu A. a bay drumi, el a bay coba den su cellular y a mira chats di whatsapp entre A. y Jayson. El a conclui cu Jayson a sunchi su yiu A. Fiscal a mustra cu hendenan di gym di Jayson a bisa cu tur ora A. y Jayson tabata hunto y ta papia den orea di otro. E ruman muher grandi di A. despues di a mira e chats di whatsapp ta haya cu Jayson tabata manipula A.

Fiscal a mustra cu segun e mucha A., el a acerca Jayson pa tin relacion pero Jayson a distancia pasobra e ta menor di edad y cu Jayson ta casa. Na dado momento A. lo a duna Jayson un sunchi den boca y asina a crea un relacion di sunchimento. Segun e mucha, despues tabatin mishimento y despues relacion sexual. E mucha A., a bisa cu e tabatin diferente biaha relacion sexual voluntario cu Jayson y cu e no tabata kier pa castiga Jayson pa esaki. Fiscal a mustra cu awor ta promer biaha den Corte cu Jayson ta bisa cu e ta enamora di A.

Fiscal ta haya Jayson culpable di a haci actonan inmoral cu un mucha y tambe a tene relacion sexual cun’e. El a tuma Jayson na malo pa esaki. Fiscal a exigi 42 luna di prison, di cual 6 luna ta condicional cu un tempo di prueba di 2 aña. Tambe Fiscal a exigi pa Jayson cay bou guia di Reclasering.

Hues, despues di a scucha defensa di abogado, a bisa cu e ta bay studia e caso y dia 29 di October 2021 lo tin sentencia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio