Home Corte Masahista cu a viola un dama y mishi na parti intimo di...

Masahista cu a viola un dama y mishi na parti intimo di un otro condena

SHARE

 

ORANJESTAD – Awe mainta e homber M.Maduro a presenta dilanti Hues di Corte di Husticia pa scucha su castigo.

Aruba Native por a compronde cu Hues un parti a aproba e exigencia di Fiscal pero a rechaza e parti di durante 3 aña M. no por traha.

Luna pasa tratamento di e caso aki a tuma lugar caminda Fiscal a bisa Hues cu tin prueba cu M. a viola e victima di Aruba y cu M. a mishi cu e victima Mericano su parti intimo. Den e caso di November 2019, M. a hinca dede den e parti intimo di e dama di Aruba. Esaki, segun ley, ta wordo considera viola. Den e caso di October 2020, e Mericano a reclama ora M. a mishi na su parti intimo. Den ambos caso M. a pidi sorry. Fiscal a remarca cu awor cu ta confronta M. cu e hechonan, e ta desmenti categoricamente.

Fiscal a exigi 255 dia di prison di cual 245 dia ta condicional cu 2 aña di prueba. Tambe Fiscal a exigi 200 ora di trabou pa comunidad y 3 aña M. no ta permiti pa traha como masahista.  Pa cu e demanda di 41 Mil florin, Fiscal a bisa cu lamentable e victima di Aruba no a bin cu recibonan pa hustifica e demanda. Pesey el a pidi pa declara e demanda no admisibel. Den un caso civil lo por bay haci esaki.

DECISION DI HUES

Hues a bisa cu e ta haya legalmente proba cu M. a mishi cu dos persona durante masashi. El a mustra cu riba whatsapp di e dama di Aruba, por mira cu M. ta pidi sorry. Hues a bisa cu e no ta kere declaracion di M., cu el a bisa sorry pasobra e dama lo por a sinti dolor durante masashi.   Hues ta haya cu M. a tacha integridad di e dos damanan. Hues a bisa cu M. a abusa di su funcion como masahista.

Hues a condena M. na 255 dia di prison di cual 245 dia ta condicional cu 3 aña di prueba. Tambe Hues a condena M. na 200 ora di servicio pa comunidad. Hues a bisa cu e no ta haya na su lugar e exigencia di Fiscal pa 3 aña, M. keda sin traha. Pa loke ta e demanda di e dama di Aruba di 41 mil florin, Hues ta haya cu e no ta suficiente argumenta y ta declara esaki no admisibel. E dama lo por cuminsa un caso civil contra M.