Home Politics Minister Dangui Oduber Asuntonan di adiccion y salud mental a keda...

Minister Dangui Oduber Asuntonan di adiccion y salud mental a keda traspasa pa Minister Rocco Tjon

SHARE

 

ORANJESTAD – Diaranson mainta Minister di Salud Publico sr. Dangui Oduber a haci traspaso di tur su trabounan di maneho di adiccion y salud mental pa colega Minister di Husticia y Asuntonan Social sr. Rocco Tjon cual lo resorta bao di su ministerio awor. 

Den e encuentro ameno aki Minister Oduber hunto cu su ekipo a duna Minister Tjon un bista riba tur locual a wordo haci den e area di adiccion y salud mental durante e ultimo 4 añanan. Minister Oduber a elabora ampliamente riba locual tabata su maneho, locual e la logra y temanan di importancia cu mester tene cuenta cune. 

Den e traspaso aki departamentonan y fundacionnan relaciona cu adiccion y salud mental cu tabata resorta antes bou di Ministerio di Salud Publico, awor lo bay resorta bou di Ministerio di Asuntonan Social. Departamento cu a keda traspasa ta entre otro Social Psychiatrische Dienst, Geestelijke Gezondheid Zorg pa menciona un par. Fundacionnan cu a keda traspasa relaciona cu adiccion y salud mental ta entre otro FMAA y FADA.

Minister Oduber a hiba un maneho serio y responsabel e ultimo 4 añanan unda cu a duna atencion poniendo e fondonan disponibel pa mehora e cuido pa esnan cu ta sufri di salud mental y esnan cu ta bringa adiccion. A traha di serca cu PAHO pa mehora e cuido y a acerca Mental Health Caribbean cu a concretisa e mandatario su vision y mision riba e tereno di salud mental y adiccion. A enfoka riba un maneho integral di psikiatria y adiccion, reconociendo adiccion como un malesa mental. 

Un maneho caminda e cuido ta yega serka esnan cu mester di dje y teniendo na cuenta e necesidad di e cliente. A rebiba e departamento di SPD biniendo cu e FACT Team cu pa prome biaha a enfoka riba e menornan di edad cu ta sufri di salud mental y/of adiccion. E FACT Team ta un team ambulante cu ta yega serca e pashent pa asina duna nan e guia y ayudo den nan contexto.

Minister Dangui Oduber a haci hopi trabou pa percura pa mehora e cuido di esnan cu ta sufri di adiccion y salud mental pero naturalmente tin hopi trabou ainda pa wordo haci. Den esaki Minister Oduber ta desea colega Minister Rocco Tjon tur clase di exito pa su cargo nobo.