Home Local Prome Minister Evelyn Wever-Croes: GANADORNAN DI CONCURSO DI PINTAMENTO “STIMA...

Prome Minister Evelyn Wever-Croes: GANADORNAN DI CONCURSO DI PINTAMENTO “STIMA BO CACHO” 2021

SHARE

ORANJESTAD– Na aña 2019, algun siman despues cu a anuncia e Plan Nacional pa atende cu e problematica di cacho na Aruba, a inicia cu e prome concurso di pintamento pa muchanan di scol basico: “Ley di Cacho”. Aña pasa a bini cu un concurso di pinta y kleur pa muchanan di kleuter te cu 3e klas: “Bo Mascota Faborito”.

E aña aki ta di tres aña cu ta organisa un concurso caminda a traves di nan pintura muchanan ta expresa y siña tocante Aruba su Ley di Cacho. Pa pone e cherry riba e bolo, danki na Post Aruba N.V. 4 mucha lo tin e honor cu nan pintura ta wordo uza como stampia na aña 2022.

E muchanan tabatin te diahuebs 23 di september pa a entrega nan pintura. E comision a ricibi mas cu mil formulario di participacion. Diaranson siman pasa e huradonan a pasa door di e pinturanan pa scoge 24 ganado; pa cada klas y cada tema tin un ganado. Mirando e talento destaca door di nos muchanan, a dicidi di nomina pa cada klas un mucha mas como ganado na di dos luga.

30 mucha, cada un cu 1 adulto, a wordo invita pa bin tuma nan regalo na Bestuurskantoor y saka potret cu nos Prome Minister Evelyn Wever-Croes, Minister Ursell Arends y Minister Endy Croes.

E nomber di e 30 muchanan ta: (1e klas) Jason Croes, Rodrigo Méndez, Jaylianne Kock, Esther Blijden, Richelly de Jongh, (2e klas) Indra Bito, Victoria Villegas Bravo, Sophia Marquez, Jerson Geerman, Gracylaine Winklaar, (3e klas) Liandra Kock, Jayron Ras, Valeska Pérez Santiago, Noeska Gumbs, Oliver Kock, (4e klas) Jahyah Eisden, Angel Shurumay, Zuwenshka Felomina, Sophia Brink, Sofia Escalona, (5e klas) Wimney Oduber, Jeylimar Bermudez, Marianne Casafus, Evoleth Urdaneta Contreras, Anastasia de Palm, (6e klas) Nathan Kelly, Josue Santana, Allegra Dubero, Diyoura Croes y Esmeralda Jacobs.

Representantenan di Post Aruba N.V. tambe tabata presente pa anuncia e 4 ganadonan di stampia. E 4 temanan y e ganadonan di stampia di e concurso di pintamento “Stima Bo Cacho” 2021 ta: (1) baña bo cacho; Nathan Kelly den 6e klas di St. Anna School, (2) hunga cu bo cacho; Angel Shurumay den 4e klas di St. Anna School, (3) bo cacho como parti di bo famia; Marianne Casafus den 5e klas di Scol Primario Kudawecha, y (4) cacho na leash; Evoleth Urdaneta Contreras den 5e klas di Maria School.

Prome Minister di Aruba ta contento cu e comision ta sigui purba inculca e respet pa nos Ley di Cacho y e amor pa mascota cerca nos muchanan. E comision kier gradici tur cu na un forma of otro a aporta pa haci e dia aki uno sumamente inolvidabel pa nos muchanan. Un danki special ta bay na tur e scolnan cu a participa activamente y tambe na e mayornan cu a percura pa nan yiunan participa.