Home Politics Nigeria ta reconoce experticio di Aruba pa desaroya nan sector di turismo

Nigeria ta reconoce experticio di Aruba pa desaroya nan sector di turismo

SHARE

Den Haag – Minister Plenipotenciario Guillfred Besaril recientemente a ricibi bishita di e embahadora di Nigeria na Hulanda dr. Eniola Olaitan Ajayi.

Meta di e bishita di embahadora Olaitan Ajayi ta pa cera conoci cu e representante di Aruba na Hulanda y alabes e ta haya hopi importante pa mantene bon contacto cu tur e paisnan den Reino Hulandes.

Durante di e bishita a papia riba diferente topico, manera enseñansa y salubridad publico. Embahadora Olaitan Ajayi a bisa Minister Besaril cu Nigeria ta hopi interesa pa papia cu Aruba riba manera pa desaroya e sector di turismo. Nigeria ta reconoce cu Aruba tin hopi experticio riba e tereno aki y pesey embahadora Olaitan Ajayi a bisa cu e ta planea pa bishita Aruba fin di November e aña aki y asina banda di otro compromisonan, intercambia di idea riba esaki cu ATA.

Minister Besaril a bisa embahadora Olaitan Ajayi cu Arubahuis sigur lo brinda tur sosten nesesario conhuntamente cu Aruba pa haci e bishita uno exitoso.
Como aprecio pa e bishita a tuma lugar intercambio di regalo entre embahadora Olaitan Ajayi y Minister Besaril.

Nota pa redacion: E potretnan ta cortesia di Cas di Aruba