Home Politics PROME MINISTER PRESENTE NA EVENTO PA NOS ADULTONAN MAYOR “Ta hopi...

PROME MINISTER PRESENTE NA EVENTO PA NOS ADULTONAN MAYOR “Ta hopi importante pa nos por conserva tur loke nos a siña di nos dushi grandinan”

SHARE

Diabierna atardi, Prome Minister Evelyn Wever-Croes tawata presente na Cas di Cultura pa e evento organisa pa e Grupo Nucleo en conexion cu Dia Internacional di Adultonan Mayor. Un bunita iniciativa cu e titulo ‘Intercambio cultural entre generacionnan’ na unda gruponan 60+, nan yiu y nietonan a subi escenario y duna nan buntia presentacionnan den canto, baile y comedia entre otro. Na e ocacion, Prome Minister y Minister di Asuntonan di Adultonan Mayor, Ursell Arends a hiba palabra na unda ambos a gradici nos grandinan pa e trabounan cu nan a haci pa desaroyo di nos pais.

 

Tur aña dia prome di October, ta celebra e dia aki cu nos adultonan mayor. Prome Minister dirigiendo su mes na nos adultonan mayor, a expresa, 

 

“Nos ta hopi orguyoso y hopi agradecido pa tur locual cu boso a haci pa nos pais, pasobra boso ta e constructornan di nos pais cu nos ta biba aden awe. E pais aki cu nos generacion poco mas hoben por lanta nos yiunan den dje y cu mayan nan por lanta nan yiunan den dje. E pais aki cu boso trabou y dedicacion y cu amor bosonan a crea y p’esey awe ta asina importante pa nos tambe tey pa nos celebre”. 

 

Gobierno di Aruba a decreta October como luna di Adulto Mayor na Aruba na unda cu atencion lo wordo duna na e personanan den nos comunidad cu a construi nos pais pa awe nos tur por goza di dje. Den su discurso na e ocacion aki, Prome Minister a enfatisa e balor di famia cu nos Adultonan Mayor a inculca den nos Sociedad.

 

“E celebracion di Adultonan Mayor ta basa riba famia, nos generacionnan, nos tradicionnan. E ta hopi importante pa nos cada un inculca den nos yiunan, den nan yiunan, den nos futuro generacionnan pa asina e bunita herencia por keda traspasa di generacion pa generacion. Y ta hopi importante pa nos por conserva tur loke nos a siña di nos dushi grandinan. Intercambio cultural entre generacionnan ta e tema di celebracion di nos grandinan. 

 

Y e ora mesora nos ta pensa riba famia cu ta e fundeshi di mas importante cu ta existi. Famia cu ta caminda nos a wordo lanta cu norma y balornan importante pa bida y cu nos ta sigui traspasa esaki pa futuro generacionnan. E rikesa y calidad di bo pais bo no ta midi solamente na economia  y finansas sino tambe na e balornan etico, na bo hendenan, na bo sociedad y na bo famianan. Famia t’e base firme cu ta permiti nos funciona cada dia. Cada un di nos a traves di nos famia, nos hogarnan, nos por contribui na un miho Aruba, na nos Sociedad formando hendenan integro, cu balor, responsabel, cu ta actua cu honrades y ta dirgi na otro cu rektitud. Y ora e relacion familiar ta yen di amor, comprension, fe y speransa y bon comunicacion, esey ta garantisa nos bon harmonia den famia y ta yuda henter e comunidad”.

 

Prome Minister a gradici di curason cada un di nos adultonan mayor pa tur loke nan a haci y ta haciendo ainda pa Aruba. Premier a gradici tambe Grupo Nucleo pa e invitacion pa comparti un momento hopi ameno den presencia di nos adultonan mayor cu tawata presente. 

 

“Pami ta un honor di tawata presente na e celebracion aki y mi ta gradici pa e invitacion. Dios bendiciona cada un di bosonan”, Prome Minister a expresa.