ORANJESTAD – Awe mainta Corte den Promer Instancia a trata e caso penal cu Ministerio Publico a cuminsa contra e homber J.G. kende ta wordo acusa di a purba mata un agente di Polis y resisti contra su detencion.
Aruba Native por a compronde cu J.G. no a presenta den sala di Corte pa e caso y Hues a dicidi cu ta sigui cu e caso. E tratamento no a dura mucho ya cu Fiscal a bisa cu apesar cu tin procesverbaal di e agentenan envolvi, no tin suficiente prueba y ta pidi pa declara J.G. liber. E acusacionnan cu Fiscal a presenta contra J.G. ta cu riba 6 di Mei 2021 el a manda auto cu velocidad halto riba un agente di Polis. Esaki ta wordo considera di a purba mata un agente di Polis. Tambe Fiscal ta acusa J.G. di a resisti contra su detencion e dia ey.
Fiscal a bisa Hues cu e tin procesverbaal di e dos agentenan di Polis, cu ta bisa cu J.G. a manda auto riba un di e agentenan y despues a resisti contra su detencion. Pero si pone esaki banda declaracion di 3 testigo y imagennan di video di seguridad, Fiscal ta haya cu e no tin prueba convicente.
Fiscal a mustra cu riba e video ta mira cu J.G. no a manda e auto cu velocidad halto y tampoco ta mira cu e agente di Polis a bula un banda. Tambe no ta mira cu J.G. a resisti contra su detencion.
Fiscal a bisa Hues cu e no ta haya cu tin prueba convicente y pesey e ta pidi pa declara J.G. liber di tur dos acusacion.
Hues a sera tratamento di e caso y a dicta sentencia di biaha. Hues a bisa cu e tambe a mira e video y enberdad e no ta mira cu J.G. a core cu velocidad halto y cu e agente di Polis mester a bula un banda. Tampoco Hues a mira cu J.G. a resisti contra su detencion. Hues a declara J.G. liber di tur dos acusacion.