Home Local Dia Internacional di Adulto Mayor

Dia Internacional di Adulto Mayor

SHARE

Riba dia internacional di Adulto Mayor, crioyamente bisa dia di nos grandinan, Departamento di Salud Publico, Seccion Cuido di Nos Grandinan kier a trece conscientisacion den nos comunidad ariba e retonan cu adultonan mayor ta confronta. Conforme cifranan di CBS 2020, 17.288 persona di nos poblacion ta 65+ cu ta 16% di nos populacion.

Tema pa 2021 di Nacionnan Uni en conexion cu dia Internacional di Adulto Mayor
Anualmente Nacion Uni tin un tema e aña aki e ta: “Igualdad Digital pa tur edad”. E tema aki ta afirma e necesidad di acceso y participacion significativo den e mundo digital di esnan adulto mayor. Y esaki sigur ta bin bek den e retonan cu nos grandinan ta confronta cune.

Na Aruba e accesibilidad pa cu e mundo digital ta hopi halto, 71% di esnan 65+ tin conexion di Internet di un of otro forma. Esaki sigur ta hopi positivo y necesario mirando cu e mundo di technologia ta avansando hopi lihe. Loke ta trata e conocimento di uzo digital si ta hopi abou entre nos adultonan mayor.

Mientras cu mundo completo ta haciendo esfuersonan pa conecta mas hende cu otro, riesgonan nobo a bira evidente. Un ehempel di esaki ta e delitonan cibernetico y mal informacion ta menasando e derechonan humano, privacidad y seguridad di adultonan mayor.

Importancia di uzo digital durante pandemia di covid-19
Desde aña pasa nos ta experenciando e pandemia di COVID-19. Esaki a trece hopi cambio cune den maneho di cuido di adultonan mayor tur rond mundo; mirando cu esnan clasifica como adulto mayor ta pertenece na un di gruponan mas vulnerabel y cu risico halto pa contrae COVID-19.

Hopi famia no por a bishita of mira nan ser keri y esaki a haci cu esnan den cas di cuido tabata sufri mentalmente y emocionalmente. Akinan ta caminda e importancia digital ta prevalece. E unico manera cu por a mantene contacto cu nan famia tabata atraves di videocall uzando i-pads y telefon cellular (chikito, manera nos grandi nan ta yame) pa comunica cu nan famia y asina tambe pa nan por a wak otro.

E aña aki, Gobierno di Aruba, en conexion cu e fecha internacional di aldulto mayor a declara e luna di oktober como luna pa conscientisacion di adulto mayor. Seccion Cuido di Nos Grandinan ta bay tin un segmento special pa conscientisa nos comunidad ariba e retonan cu adultonan mayor ta confronta. Keda pendiente riba e pagina di Facebook di DVG.

Departamento di Salud Publico, Seccion Cuido di nos Grandinan (Dienst Ouderenzorg) ta duna danki na tur e enfermeranan, famianan, amistadesnan y bisiñanan cu ta aporta na e ayudo y cu ta cuida y proteha nos grandinan. Tambe nos kier a gradici tur Nos Grandinan pa nan aporte y sosten pa nos dushi pida baranca stima, nos Aruba. Ban keda traha uni pa por combati y surpasa e temponan dificil cu e enfoke riba e bienestar di Nos Grandinan. Un caluroso Pabien cu Boso dia ta bay pa tur Nos Grandinan y pa tur e Casnan di Cuido y Centronan di Actividadnan cu ta duna servicio na Nos Grandinan.