Kingston – E portada di “Rohan Bullkin and the Shadows” a keda revelá resientemente. E buki ta trata e historia di Rohan, un mucha hòmber ku ta logra transformá su rabia riba lesamentu pa amor pa buki i lektura. Juleus Ghunta, un poeta hóben hamaikino, èks dosente i èks bekado di e programa di beka Chevening, ta eskritor di e buki aki ku tin komo meta pa konsientisá Karibe, i mundu, riba eksperensianan troumátiko durante infansia (“ACE’s”), ku por tin efektonan di largu durashon riba salú físiko i mental.
Mas spesífikamente Ghunta a skibi e buki aki ku e intenshon sinsero pa “enkuarashá nos komunidatnan den Karibe pa inisiá e kòmbersashon difísil tokante atversidat durante infansia i trouma. Strès tóksiko kousá pa abusu físiko, emoshonal i seksual, negligensia, violensia i pobresa ekstremo ta mará na hopi malesa físiko i mental i un realidat sosial disfunshonal.” E ta sigui amplia bisando “Mi ta spera ku e buki aki lo inspirá diálogo i yuda tantu persona komo organisashonnan pa tuma e promé pasonan pa yega na un aserkamentu kaminda e berdadero impakto di trouma riba bida di un persona i e sosiedatnan violento ku nos ta biba aden ta e punto di salida.” E inspirashon pa skibi e buki aki tin su orígen den Ghunta su propio eksperensianan troumátiko komo mucha, sobrebibiente di violensia doméstiko, probresa ekstremo, negligensia i maltrato emoshonal, entre otro.
Ounke e buki aki ta trata temanan kompleho i ta skibí primeramente pa profeshonalnan ku ta traha pa i ku mucha, e manera líriko ku Ghunta ta skibi i e ilustrashonnan imaginativo di Rachel Moss ta hasi e buki aki aksesibel pa mucha tambe. Es mas, e buki aki por brinda víktimanan di “ACE’s” un kanal pa medio di kua nan por eksplorá nan eksperensianan, spesialmente esnan relatá na problema ku lesamentu i prestashon na skol en general. Investigashon ekstenso a komprobá ku tin un relashon fuerte entre trouma durante infansia i hopi tipo di difikultat pa siña, komportashon problemátiko, problema di salú físiko i mental i un bida di poko perspektiva.
Diferente dòkter, sikólogo, eskritor i edukadó renombrá a komentá di forma sumamente positivo riba e buki hopi antisipá aki. E ta ser konsiderá un rekurso nobo esensial pa tur profeshonal ku ta traha pa i ku mucha. E buki ta kontené tambe un lista di “ACEs” i algun rekomendashon kon pa dil ku esakinan.
“Rohan Bullkin and the Shadows”, un publikashon di CaribbeanReads, lo keda publiká 31 di dezèmber 2021. Por bishitá www.caribbeanreads.com/rohan pa mas informashon tokante e buki òf manda un e-mail na [email protected].