Home Politics Prome Minister Evelyn Wever – Croes: FINANCIAMENTO NA PAISNAN CHIKITO...

Prome Minister Evelyn Wever – Croes: FINANCIAMENTO NA PAISNAN CHIKITO Y VULNERABEL TA NECESARIO PA SOLUCIONA RETONAN DI NATURALESA

SHARE

E siman aki Prome Minister Evelyn Wever – Croes a participa na e conferencia virtual “Blended Finance in Action, SDG Finance in Small Island Development States (SIDS)” di Nacionnan Uni y Fiji. Un conferencia den cual ta wordo delibera ki forma di financiamento tin pa paisnan chikito y vulnerabel pa proteccion di naturalesa.

Manera ta conoci como SIDS, Aruba ta desproporcionalmente vulnerabel compara cu paisnan mas grandi cu tin mas recurso. Cambio di clima a demostra di ta un menasa pa entre otro e sistema di cuminda, salud y economia. Ademas ta consciente cu como pais chikito, Aruba no ta den un posicion cu por dicidi pa elimina e impacto di e reto global aki. Sinembargo, door di entre otro respeta conocemento local y haciendo bon uzo di tecnologia, por transforma e sociedad y economia den uno cu ta mas sigur y mas sostenibel pa futuro generacionnan, Premier Wever – Croes a splica.

“E cambio real por wordo realisa solamente si tin compromiso politico serio local y globalmente. Como SIDS mester y laga nos bos resona guia pa un vision positivo di con mundo lo por ta”, Premier Wever – Croes a bisa y ta enfatisa cu e enfoke mester ta riba solucionnan innovativo y financiamento pa enfrenta e realidad. Y e esfuerso aki mester ta conhunto incluyendo cada individuo, cada instituto, cada comunidad y cada pais.

E rol di Nacionnan Uni y comunidad internacional ta encera provee financiamento pa e asina yama “coral reef nations” pa logra cumpli cu e metanan describi den e SDGs. E ayudo aki di e Gobierno di Fiji ta exactamente locual “small island nations” tabata referi na dje, ora cu den pasado a adresa cambio di clima y retonan den desaroyo. Door di promove e tipo di financiamentonan aki, proteccion di rif ta wordo reconoci como e fundeshi pa sistema di desaroyo economico resiliente. Treciendo oportunidad pa comunidadnan por ta prospero den harmonia cu naturalesa.

Concluyendo Premier Wever – Croes a bisa cu e esfuerso conhunto entre Nacionnan Uni y Gobierno di Fiji ta un ehempel pa e region Caribense. A pesar di ta situa otro manda di mundo, tin hopi aspecto cu ta conecta nos cu otro. Y hunto so, den cooperacion y cu ayudo di partnernan global, por trece cambio.