ORANJESTAD – Diaranson atardi Minister di Turismo sr. Dangui Oduber a anuncia cu e aerolinea nacional Hulandes esta KLM a caba di confirma cu nan lo bay aumenta nan operacion na Aruba. KLM lo bay aumenta nan operacion cu 15 vuelonan adicional, es decir mas vuelo cu nan tabata tin planea pe inicialmente. Esaki lo sosode durante e temporada di high season entre 15 di december cu 14 di januari. Minister Oduber ta contento di por comparti e noticia positivo aki cu henter e comunidad di Aruba den cuadro di e recuperacion di nos turismo.
KLM ta un socio importante pa turismo di Aruba, ya cu ta percura pa e transporte di un gran cantidad di bishitante for di e mercado Europeo en general. Minister su maneho di mercadeo ta pa diversifica nos turismo den e mercado Europeo mescos ta conta pa e mercado Mericano. Minister Oduber kier a recorda pueblo cu di 20 di november binidero lo tin e vuelo inaugural di Frontier Airlines cu lo ta un vuelo directo for di Miami. Pa asina sigui diversifica nos turismo den e parti Mericano tambe cu ta esun di mas importante pa Aruba.
E vuelonan lo ser realisa cu un avion tipo A330-200, tin capacidad pa 268 pasahero. Cu esaki KLM a aumenta nan capasidad pa Aruba cu 4020 pasahero extra den e temporada di high season. Pa Aruba, esaki ta nifica e potencial pa un crecemento adicional den turistanan Europeo atrabes di diferente conexion via Hulanda.
Ya caba e diferente ekiponan di trabou tanto na Aruba como na e oficinanan di turismo di Aruba na Europa a cuminsa informa agencianan di biahe, operador di tours y otronan di e posibilidad awo mas amplio pa yega Aruba, specialmente den e luna friu di winter na Europa. Minister a menciona cu segun e proyeccionnan e aña aki su high season ta premira di surpasa esun di 2019 cu tabata aña sumamente existoso den turismo. Segun e mandatario e ta premira un high season sumamento positivo pa e turismo di Aruba.
Minister Oduber a menciona e proyecto di “Gateway 2030” cu ta un proyecto hopi importante pa e economia di Aruba. E proyecto aki ta un proyecto di mas di 140 miyon dollar cu lo genera mas cu 200 cupo di trabou sea directo of indirecto. E proyecto aki lo crea un spin off economico pa pais Aruba y lo trece placa den caha di Gobierno atraves di impuesto. Ta un proyecto importante pa e ampliacion y renobacion di nos aeropuerto. E mandatario a menciona tambe cu conhuntamente cu APA nan ta den pleno ehecucion di e proyecto di Port City cu ta encera un inversion di sector priva di casi 1 biyon florin y segun e planificacion esaki lo mester bay destaho publico pa fin di aña 2021.
Finalmente Minister Oduber kier a gradici Aruba Airport Authority pa tur e esfuerso cu nan ta haci pa Aruba keda ricibi mas vuelo.