Home Local “Uza bo curason pa conecta” #usehearttoconnect Stima bo curason.

“Uza bo curason pa conecta” #usehearttoconnect Stima bo curason.

SHARE

 

Sigur un of mas biaha bo a stima di curason. Stimacion ta un sentimento basico, bunita y e ta laga bo sinti completo y feliz! Mescos cu bo ta stima di curason, bo curason tambe mester di bo stimacion y cuido. Bo ta cuida bo curason suficiente? Kico bo ta haci pa cuid’e y proteh’e? Bo a yega di para keto y pensa esey?

Dia 29 di september, Dia Mundial di Curason, ta un bon oportunidad pa para keto un rato y pensa kico (mas) bo por haci pa proteha y cuida bo curason. Tin diferente actividad den bo bida diario cu bo por haci pa cuida bo curason. Kisas tin factor cu bo no tin den bo man manera por ehempel herencia familiar y edad, pero di otro banda tin hopi factor cu si bo tin den bo man manera bo sistema di come y biba. 

Con bo por yuda cuida bo curason: 

Come alimento saludabel. Come suficiente fibra. Fibra ta yuda controla e nivel di triglyceride y colesterol den sanger. Bo ta haya fibra den productonan integral manera pan volkoren, pasta y cereal integral (bruin), fruta y berdura. Disfruta por lo menos 2 biaha pa siman di pisca. Pisca ta contene Omega 3 cu ta yuda proteha e adernan. Evita vet satura cu por conduci na ceramento di ader. Vet satura bo ta hay’e den cuminda hopi procesa, manteca, carni cora y keshi.

Haci tur dia suficiente actividad fisico. Haciendo movecion ta yuda tene e nivel di colesterol, triglyceride, sucu y presion stabil. Corda haci por lo menos 30 minuut di actividad pa dia, of 3 biaha pa siman 60 minuut.

Siña maneha stress. Stress continuo ta hisa e presion di sanger y esaki ta afecta entre otro bo adernan (di curazon).

Evita humamento y limita alcohol.  Tabaco ta hisa e presion, colesterol y triglyceride den sanger. Alcohol ta pone bo curazon bati mas liher. Factornan cu ta malo pa e salud di bo curason.

Controla bo peso. Peso di mas ta afecta henter bo sistema. E tin efecto riba bo presion, sucu, triglyceride y colesterol. Tur ta factornan cu ta promove malesanan di curazon.

Ta un bon momento pa cuminsa cuida bo curason, uza bo curason pa proteha bo curason. IBiSA, DVG, AZV, SVb, WGK, HOH y FADA cu hunto ta forma Plataforma di Promocion di Salud, ta invita bo pa cuminsa practica algun, of mihor, tur e puntonan akiriba menciona pa proteha y cuida bo curason. 

Uza bo curason pa haci escohencianan saludabel!