Dia 17 di september ultimo a trata den Comision Central di Parlamento y despues den Reunion Publico un carta di Gobernador di Aruba, fecha dia 17 di september (nr. IS/017/21-22). Den e carta di Gobernador e ta pidi Parlamento pa su opinion encuanto di e retiro di Gabinete Wever-Croes y pa duna opinion encuanto candidatonan nobo pa forma parti di e Gabinete aki. E fraccionnan den oposicion no a bai di acuerdo cu nombracion di e ministers. E fraccionnan cu ta sostene gobierno si a bai di acuerdo cu e nombracion di e candidatonan nobo. Durante e reunionnan a expresa falta di informacion necesario di screening y e curriculum vitaes di e candidatonan. Wyatt-Ras den su discurso a trece dilanti cu el lo keda pendiente di informacion cu a ser pidi durante e reunion. Sinembargo te dia di awe e informacion no a ser manda Parlamento. Netamente un gobierno cu tin integridad asina halto den su prioridadnan mester por ta transparente cu pueblo y duna tur informacion necesario. Pa haya informacion al respecto Parlamentario Mervin Wyatt-Ras a manda preguntanan pa gobierno pa por haya un contesta. Den e preguntanan e ta cuestiona alabes e hecho cu e minister cu lo ta encarga cu Asuntonan Social y Justicia tin casonan den corte y veredictonan contra di su persona dor di cual e no tin outoridad ni tin “omgangsregeling” cu su propio yui. Esaki no ta bon pa un Minister cu lo ta encarga cu educacion y relacion di mucha y su mayornan. E no por tin un “voorbeeldfuntie” of no por fungi como ehempel. Wyatt-Ras ta pidi e diferente veredictonan y documentonan al respecto, paso e ta ser aserca dor di ciudadanonan preocupa. Ta necesario pa aclarea e dudanan.
E hecho cu e mesun minister cu lo ta encarga cu Asuntonan Social y Justicia a haci cu su esposa mester a entrega su encargo como comisario di Polis pa e por bira minister tampoco no a cai den bon tera serca hende muhernan prominente. Aki un biaha mas ta cuestionabel si e por tin un “voorbeeldfuntie” of por ta ehempel pa e hende muhernan cu e tin cu traha cun’e den e departamentonan cu lo cai bao di dje manera “Vrouwenzaken” y fundacionnan cu ta atende cu hende muher y ta “empodera hende muher. Wyatt-Ras ta spera di por haya contesta ariba su preguntanan mas pronto cu ta posibel y no manera cu a pasa den e anja Parlamentrio anterior cu di e preguntanan cu a ser haci na ministernan 37% so a ser contesta.