Home » A crece den loke ta tecnologia y personal Policlinica di Urologia a logra hopi avance den cuido pa pashent

A crece den loke ta tecnologia y personal Policlinica di Urologia a logra hopi avance den cuido pa pashent

by Admin
0 comment 52 views

 

 

ORANJESTAD, Aruba  Luna di September ta pone atencion riba consientisa tur hende riba e malesanan urologico. Hopi hende ora bo puntra kico e specialismo di urologia ta encera no por bisa esaki cu siguridad. Mayoria di pashent cu ta presenta na Policlinica di urologia ta hende homber, pero alabes ta trata un grupo grandi di hende muhe tambe. Prevencion di mayoria malestar cu yega Policlinica di urologia no ta posibel, pero si biba un bida saludabel y bebe suficiente awa por preveni hopi problema cu canal di urina den futuro. Pero tambe si yega na tempo na bo dokter di cas pa cualkier chekeo por yega na salba bo bida. 

 

Mayoria pashent cu ta yega na Policlinica di urologia ta hende homber, pero mas of menos 30% ta hende muhe.Dr. Randall Leong, specialista di urologia, a duna di conoce cu nan ta cuminsa trata desde riñon y ta bay completamente te na e blaas. Tambe nan ta bay specificamente na e parti genital di hende homber, esta prostaat, penis y e testiculonan. Nan no ta trata solamente hende homber, pero hende muhe tambe na e riñon of blaas. 

 

E enfermedad cu mas e specialistanan di urologia ta topa cu ne ta dolor di piedra y aki na Aruba esey ta algo comun. Un otro motibo ta cancer di prostaat y problema door di orina paso prostaat ta crece. Esey ta e tres enfermedadnan comun cu tin aki, pero asina mes ta trata hopi otro tambe. Dr. Leong a bisa cu edad di pashent ta varia, pero tambe ta depende di e enfermedad. Un ehempel ta problema cu prostaat, cu ta presenta mas tanto entre homber di 60 pa 70 aña di edad. Problemanan di piedra ta varia den edad.  

 

Prevencion ta depende di e tipo di caso, asina dr. Leong a splica. Un ehempel ta cancer di prostaat cu ta conseha pa haci chekeo di sanger desde 50 aña cual ta wordo haci pa dokter di cas. Ta importante pa haci esaki por lo menos un bes pa aña, p’asina por detect’e y salba un bida na tempo. Piedra, cu ta esun mas comun, ta bin door di no bebe suficiente awa. Mester bebe hopi awa pa preveni produccion di piedra.
“Den mundo di piedra y tambe como cancer, a bin sali afo cu esunnan cu ta come menos proteina animal, esta e vegano- y vegetarianonan, tin menos chens di forma piedra y haya cancer. Esey ta algo cu por haci pa preveni,” asina dr. Leong a duna di conoce. 

 

Den e ultimo dies añanan a bin basta cambio. A modernisa e aparato di echografia y tin e aparato scope masha moderno cu por mira den e blaas. Hospital a bay over na digitalisacion di dossier di  pashent cual ta un paso grandi den mundo medico. Recientemente a haya un aparato di laser pa kibra piedra, cu ta nobo nobo y t’un avance grandi cu tin aki na Aruba den mundo di urologia.

 

Team di urologia a crece y awo nan ta tres specialista. Nan tin un team di tres secretaria y loke ta nobo y a haci un cambio grandi pa mehora e policlinica su servicio ta un nurse di urologia. Esaki sigur a mehora e servicio pa pashent grandemente.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio