Home Politics Minister Dangui Oduber a reuni cu director di Imsan Sr Joel Rajnherc...

Minister Dangui Oduber a reuni cu director di Imsan Sr Joel Rajnherc pa comparti e maneho 2021-2025

SHARE

ORANJESTAD – Durante e combersacion aki minister Oduber a comparti e vision cu e kier mira den Salud Publico na Aruba. A splica e director di Imsan riba e maneho cu kier wordo hiba riba mehoracion di e calidad di cuido, mehoracion di servicio y baha e tempo di espera na pa specialistanan. Lo bay percura pa busca mas specialista y lo bay inverti y ehecuta e programa nacional di prevencion, tambe lo bay enfoka riba hiba un bida mas saludabel.

 

Imsan ta hopi importante pa ministerio di salud den cuadro di e maneho cu kier wordo hiba. Durante e periodo di gobernacion di Gabinete Wever Croes 1, minister Oduber a brinda tur cooperacion necesario pa haci e inversionan cu tawata tin mester pa por finalisa e proyecto di radioterapia y tambe percura pa Imsan haya 22 cama cu por wordo usa pa shortstay hospital.

Pa e proximo periodo minister Oduber ta comprometi pa continua e inversionan y busca un PET CT scan pa Imsan. Di e forma aki nos lo cuminsa percura pa haci turismo medico na Imsan. Tambe lo busca mas dokter di wowo pa reduci e wachtlijsten nan.

Loke ta hopi importante tambe pa den e periodo di gobernacion aki wordo cristaliza ta e JCI accreditation pa Imsan. Tur e añanan cu a transcuri Imsan ta trahando hopi duro pa logra esaki y pa e periodo aki e lo ser logra.

E JCI accreditation aki lo habri posibilidadnan pa Imsan pa por sigui crece.

Minister Dangui Oduber por mira bek un bon reunion y sigur ta conta cu tur cooperacion di Imsan pa percura pa e maneho di mehoracion di cuido, calidad y servicio wordo ehecuta.