Home Corte Homber cu a tira otro na San Nicolas condena na 7 aña...

Homber cu a tira otro na San Nicolas condena na 7 aña di prison

SHARE

ORANJESTAD – Corte den Promer Instancia a dicta sentencia den e caso penal cu Ministerio Publico a cuminsa contra e homber G.V.F., su ruman G.F. y e otro acusado C.A.R.

Aruba Native por a compronde cu ta trata di tiramento na San Nicolas cu a sosode 21 Februari 2021, caminda G.F.V. a tira B. den pia. E sentencia tabata via video conference y mester a separa G.F.V. for di e otro dos pasobra e tin problema cu su ruman G.F. Esaki pasobra G.F. a conta tur cos.

Algun siman pasa tratamento di e caso a tuma lugar den Corte caminda e acusadonan tabata presente. Fiscal a bisa cu e ta haya legalmente proba cu G.V.F. a tira. B. riba 21 Februari 2021. Ta asina cu G.V.F. ta wordo yama (Baas). Fiscal a mustra cu e dama K. a bisa cu Baas a saca arma riba dje y primi dos biaha y despues a tira B. Otro testigo a bisa cu G.F. tambe tabatin un arma. Polis a haya e 3 armanan pero un revolver no ta funciona. Tambe a haya e 17 balanan. Tambe Polis a haya 0.5 gram di cocaina cu ta di C.A.R.

Fiscal a exigi pa C.A.R. 30 luna di prison, di cual 15 luna ta condicional cu un tempo di prueba di 3 aña. Pa G.F. el a exigi 40 luna di prison di cual 20 luna ta condicional cu 3 aña di prueba. Pa G.V.F., kende ta esun cu a tira, el a exigi 8 aña di prison.

Hues a cuminsa cu G.F.V. caminda el a bisa cu no a keda proba e menaza cu arma y ta declar’e liber pa e acusacion aki. Hues ta haya G.F.V. culpable di riba 21 Februari 2021, a tira riba B. Tambe Hues ta haya G.F.V. culpable cu entre Februari y Maart 2021 e tabatin 3 arma di candela y 17 bala.

Hues a remarca cu e hecho cu G.F.V. a saca arma y tira, sin tin conocemento di tira, ta haci cu e por a mata B. Hues ta haya esaki intento di mata y complice di posecion di arma di candela y balanan. Hues a condena G.V.F. na 7 aña di prison, kitando e tempo cu e tabata sera den KIA.

Despues a sigui cu G.F. y  C.A.R. Hues a bisa cu a keda legalmente proba posecion di armanan di candela y 17 bala. Hues a declara G.F. liber di complice di intento mata. C.A.R. tambe tabatin un cantidad di cocaina cun’e.

Hues a tene cuenta cu G.F. den pasado a wordo condena caba pa arma. El a condena G.F. na 24 luna di prison di cual 8 luna ta condicional y 2 aña di prueba. Hues a condena C.A.R. na 18 luna di prison di cual 6 luna ta condicional cu 2 aña di prueba.