ORANJESTAD – Departamento di Asuntonan Economico, Comercio y Industria y su unidad Exprodesk ta invita tur musico pa participa na e campaña di “Miami’s 88.9FM WDNA Broadcasting Radio”. Si bo ta un musico y bo ta pensa riba e posibilidad pa extende bo carera, esaki ta bo oportunidad pa Bo resona den exterior y crea un ‘fan base’ mas grandi. E campaña lo cuminsa dia 24 di september 2021 te cu dia 9 di october 2021 y lo ta completamente gratis pa participa.
E campaña “WDNA” ta un campaña unda cu Exprodesk ta duna nos musiconan local e oportunidad pa nan propio composicion resona na Florida y asina duna nan e oportunidad di por expande nan musica na un otro nivel. Tur musico di tur genero lo por participa na e campaña aki. Pa participa nos ta pidi tur nos musiconan cu ta interesa pa primeramente inscribi nan canticanan na Oficina di Propiedad Intelectual pa nan por ta protegi bou di e derecho di autor. Siguientemente nos ta pidi pa esnan cu kier manda nan canticanan, pa haci esaki via un MP3 audio file hunto cu nan link di YouTube si acaso nan tin videonan. Tur musico mester manda nan canticanan/audio files prome cu dia 9 di october 2021 na: [email protected]
Di e manera aki Exprodesk tin como meta pa promove nos musiconan Arubano di tur genero door di expone nos canticanan local riba mercado internacional. Di e manera aki tambe Exprodesk ta contribui na e desaroyo di nos Industria Creativo door di promove exportacion di creacionnan di nos artistanan, brindando nan e oportunidad pa saca probecho di nan talento y creatividad.
Ta importante pa menciona cu Exprodesk no lo ta esun cu lo bay selecciona e canticanan di e campaña aki, sino e locutornan di “WDNA”. Exprodesk ta facilita pa ricibi e canticanan y manda esakinan pa e radio di “WDNA” na Florida. “WDNA” lo bay ta esun cu lo scohe e musiconan cu nan lo presenta den e luna di oktober.
Pa mas informacion over di e campaña di “Miami’s 88.9FM WDNA Broadcasting Radio”, con pa participa of con pa registra, por tuma contacto cu Sra. Sharon Meijer via: [email protected]