Home Local Casonan di skimming ta wordo soluciona CMB ta gradici Cuerpo...

Casonan di skimming ta wordo soluciona CMB ta gradici Cuerpo Policial Arubano

SHARE

Nos clientenan lo por ta na altura di e ultimo noticianan den media tocante e reciente atakenan di “skimming” riba e sector bancario di Aruba. Nos ta extremadamente complaci di por anuncia cu debi na e accionnan rapido y decisivo di nos Cuerpo Policial Arubano, a logra captura e malhechornan aki y pone un fin na nan actividadnan criminal. Na mes momento nos lo kier a gradici e ekiponan di Seguridad y staff di tur e banconan, como tambe nos clientenan cu a hunga un rol significante den pone e eventonan desafortuna aki yega na un final. 

Den e siguiente dianan, y tumando precaucion abundante, Caribbean Mercantile Bank (CMB) lo tuma contacto cu clientenan cu posiblemente a wordo comprometi pa asina sigura cu nan cuentanan ta safe y tambe pa produci tarhetanan nobo si acaso esey ta necesario.  

CMB ta tuma e seguridad y proteccion di su clientenan hopi na serio. Mientras cu nos no por controla e tipo di actividad criminal aki y stop nan di sosode, nos ta agradecido di por dispone di technologia necesario y medidanan di seguridad pa proteha nos clientenan. Nos ta masha agradecido tambe di por bisa cu debi na e medidanan di seguridad te cu e fecha di awe CMB no a experencia ningun perdida financiero.

Un biaha mas nos lo kier a gradici nos Cuerpo Policial pa nan trabao duro y dedicacion den soluciona e incidente desafortuna y pone yega na un fin rapido. 

Nos kier sigura cu, debi na e medidanan di seguridad avansa, nos ATM’nan ta y lo sigui ta un medio safe y sigur pa procesa transaccionnan bancario diario. Tambe nos lo kier a curasha clientenan pa probecha di nos servicionan di Mobile Banking y e paz mental, y facilidad cu esaki ta ofrece. 

Finalmente, nos lo kier a sigura tur ciente cu nos lo continua di ta vigilante den nos esfuersonan pa percura cu tin siguridad financiero y cu nos lo sigui inverti den e tecnologianan rekeri pa proteha nos banco y nos balor di mas importante cu ta nos clientenan. 

Si tin cualkier pregunta of pa mas informacion, por fabor tuma contacto cu nos servicio di eAmigo Online Assistance via cmbnv.com y un representante lo atende bo via Live Chat, of tambe por yama nos Contact Center na +297 522-3000.