Home » Premier Wever – Croes, na ocasion di celebracion 6 aña di SDGs – BANDERA DI SDGs A WORDO HISA DILANTI DI BESTUURSKANTOOR

Premier Wever – Croes, na ocasion di celebracion 6 aña di SDGs – BANDERA DI SDGs A WORDO HISA DILANTI DI BESTUURSKANTOOR

by Admin
0 comment 39 views

“Laga e bandera di SDGs ta nos guia pa cumpli cu e metanan pa 2030”

 

ORANJESTAD– Anualmente riba e fecha 25 di september ta celebra aniversario di e Metanan di Desaroyo Sostenibel, “Sustainable Development Goals” (SDGs). E aña aki na e di 6 aniversario di e metanan di desaroyo sostenibel Premier Evelyn Wever – Croes den nomber di Gobierno di Aruba a hisa e bandera di e metanan stipula pa logra na 2030 dilanti di Bestuurskantoor na unda tambe el a duna un discurso cortico enfatisando e importancia di e metanan di desaroyo sostenibel pa nos pais. 

 

SDGs ta encera un total di 17 meta stipula como guia pa yega na e nivel di prosperidad y paz mundial. E metanan aki ta consisti di 5 pilar:  E Ser Humano, Planeta, Prosperidad, Paz y Colaboracion. Pues SDGs ta forma un compas y ta duna direccion pa por yega na un comunidad y un Pais mas resiliente. 

 

‘Pa Aruba e SDGs ta un prioridad tambe a pesar di e retonan cu nos tin como Pais chikito. Awor mas cu nunca cu mundo henter ta experenciando retonan grandi a consecuencia di e pandemia, nos ta keda mes determina pa Aruba hunto cu mundo henter, traha den bon colaboracion pa e SDGs por brinda paz, prosperidad y un planeta sano’, Prome Minister Wever – Croes a expresa.

 

Gobierno di Aruba ta uni su mes y ta wak e SDGs como un guia pa nos tambe por yega na un nivel eleva di prosperidad y na unda paz ta reina pa un y tur, respetando nos naturalesa. Mescos cu mundo ta celebrando e SDGs, Aruba su respuesta na e retonan nos dilanti mester ta uno di union unda cu ta invita henter comunidad, sector publico, sector academico y NGO’s pa hunto enfoca pa desaroya solucionnan inovativo y sostenibel. 

 

Prome Minister a conclui enfatisando cu pa realisa e metanan aki exitosamente e ta rekeri esfuerso di nos tur. ‘Gobierno no por haci’e su so, Aruba mester di nos tur. Cu accionnan decisivo nos por pregresa, nos por avansa y nos por crea un futuro resiliente pa un y tur riba nos isla. Nos bienestar ta depende di bienestar di otronan.’

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio