ORANJESTAD– Na comienso di september, ora e voorzitter di e comision di accion cu ta encarga cu ehecucion di e Plan Nacional pa atende cu e problematica di cacho a anuncia e concurso di pintamento “stima bo cacho”, e la indica cu ya caba tabatin ideanan riba mesa pa nos chikitinnan.
Awe, diabierna 24 di september ta inicia e concurso di kleur “stima bo mascota” special pa muchanan di 4, 5 y 6 aña cu ta bishita un scol preparatorio.
META
E meta di e concurso di kleur “stima bo mascota” 2021 ta pa sigui conscientisa comunidad, specialmente muchanan, cu nan mascota merece bon cuido. E comision di accion ta convenci cu si cuminsa inculca e amor pa mascota cerca nos muchanan, esey ta garantisa un miho futuro pa locual ta trata e cuido di mascota door di nan doñonan y un escogencia responsabel si ta tuma un mascota si of no.
TEMA
Riba e pintura bo por mira un veterinaria cu varios mascota rond di dje. Asta por mira un cacho recientemente opera cu su “cone” bisti pa e no por mishi cu su herida. Esaki ta pa mustra cu e ta masha normal pa laga sterilisa bo mascota; algo sumamente importante pa realisa y cu ta un tremendo manera pa yuda controla e populacion di cacho.
KENDE POR PARTICIPA
Participacion ta gratis. Aña pasa e comision di accion a haci un concurso di pinta & kleur pa muchanan di kleuter te cu 3e klas. E aña aki, cu cooperacion di Compra/Purina y diseño door di Armando Goedgedrag, tur hende por participa na e concurso di kleur, pero tin premio specialmente pa muchanan di 4, 5 y 6 aña di edad y no ta permiti mas cu un formulario pa cada participante.
E comision di accion lo purba bishita tur scol preparatorio pa entrega algun copia di e formulario, pero tur scol preparatorio a ricibi e formulario di participacion awe via email pa nan mes print. Tambe lo por busca e formularionan di participacion na Bestial Pet House na Shaba, Birds ‘N Fishes + Dogs Pet Shop na Dakota y na Home Fun Super na Savaneta tambe.
PREMIO
Muchanan tin te dia 4 di november 2021, exactamente 1 luna despues di Dierendag, pa entrega nan formulario di participacion na un di e siguiente luganan: tur 4 MFA, na Hulpbestuurskantoor San Nicolas, na Bestuurskantoor Oranjestad, of na e luganan menciona caminda por busca formulario. Dia 21 di november, dia internacional di mucha, lo anuncia e ganadonan di cada edad riba pagina di FaceBook Stima Mi Mascota. E comision ta invita henter comunidad pa stimula muchanan participa na e concurso aki pa e concurso ta uno exitoso un biaha mas.