Home » Prome Minister ta expresa su deseonan pa nos pueblo HUNTO NOS TA LOGRA. ARUBA MESTER DI NOS TUR!

Prome Minister ta expresa su deseonan pa nos pueblo HUNTO NOS TA LOGRA. ARUBA MESTER DI NOS TUR!

by Admin
0 comment 58 views

Den e prome dianan di Gabinete Wever-Croes II, Prome Minister Evelyn Wever-Croes ta expresa su emocion como hende muhe di nos pais cu un biaha mas ta sirbi nos pais como nos Prome Minister enfatisando su deseonan pa Aruba por tin e prosperidad y bienestar cu tin como meta comun di cada ciudadano.

“E prome biaha tabata un sensacion hopi special, cu pa prome biaha un hende muhe como Prome Minister di nos pais. E di dos biaha e ta mas special ainda pasobra e ta duna mi e oprotunidad awor di no siña e trabou pasobra mi a siña e trabou durante e 4 añanan, pero pa enfoca mas caminda cu mi tin cu enfoca”, Prome Minister a duna di conoce.

Prome Minister a expresa su deseo di mira cada ciudadano di nos pais prospera y ta feliz, logrando nan metanan cu nan ta propone den nan curason y mente. Como Prome Minister pa di dos termino, e mandatario principal di nos pais ta espresa su deseo di por ta un inspiracion pa cada ciudadano di nos comunidad pa logra nan meta.

“Mi deseo grandi ta di por inspira otronan, inspira hende muhe y hende homber tambe, inspira nos mucha muhenan y nos mucha hombernan pa logra nan meta. Ta importante pa tur sa cu kico cu nan hinca den nan cabes, contal cu e curason ta na bon luga y nan traha duro pe, cada ken ta logra nan meta. No tin nada cu ta stroba bo”, Prome Minister a expresa.

Prome Minister ta pone enfasis riba nos mucha muhenan especialmente cu ta bayendo scol aworaki, pa nan tin den nan cabes cu the sky is the limit. Pa nan ta sigur cu nan por logra tur locual cu nan propone den nan curason.

Pa e hende muhenan cu ta pasano den momentonan dificil, Prome Minister a expresa su deseo di ta un inspiracion pa nan y cu nan por kibra e circulo di dificultad den nan bida. E speransa ta cu hunto cu e stakeholders cu ta traha riba e tereno aki, por duna un sosten na e hende muhenan aki y pone nan para bek riba nan pia trankilamente pa nan por ta cu nan famia y nan por lanta nan famia fuerte den nos sociedad.

Un otro deseo cu Prome Minister a expresa ta pa durante di e 4 añanan nos dilanti, sigui guia nos Pais den trankilidad riba e caminda di progreso y bienestar.

“Ta un Prome Minister di Aruba ta un honor enormemente grandi y mi ta sumamente agradecido na Dios na prome luga y na tur esnan cu ta sostene nos y henter pueblo di Aruba pa e sosten. Y cu mi por haci e trabou aki un biaha mas hunto cu henter Aruba hibando Aruba den e caminda di progreso y bienestar. Mi deseo ta pa inspira cada ciudadano di nos pais pa para hunto cu mi pa asina hunto den un solo meta nos logra. Aruba mester di nos tur, Prome Minister Evelyn Wever-Croes a enfatisa.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio