Home Dutch Kingdom Polis Hulandes a duna prensa imagennan y video di tres persona cu...

Polis Hulandes a duna prensa imagennan y video di tres persona cu a secuestra un persona robes, relaciona cu droga

SHARE

VIDEO Y IMAGENNAN DI E CASO DI SECUESTRO EKIBOCA AKI

Cruquius, Haarlemmermeer, Hulanda:
Diahuebs 5 di augustus ultimo, den e gemeente Cruquius, un homber(56) di Hoofddorp den careda di 6’or di atardi a keda secuestra, e la wordo saca for di su auto y a wordo hinca den un van cora, Mercedes Benz Vito. Despues cu nan a hinca e homber den e van nan a subi N201 direccion di Hoofddorp.  

Polis mesora a cuminsa cu un investigacion y buskeda rigoroso pa e victima secuestra. E mesun anochi polis a detene 6 sospechoso cu lo mester tin di haber cu e secuestro. Tambe na Gouda caminda cu polis a detene algun sospechoso, nan a bin topa cu e Van den cual e secuestradonan a transporta e victima.

Diadomingo, tres dia despues di e secuestro, mientras cu e investigacion y buskeda tabata den full swing. Polis a duna e informacion cu posibelmente e secuestradonan a bay cu un persona robes. Ministerio Publico a pone un recompensa di 15 mil Euro pa e tip di oro cu lo por yuda nan yega na soluciona e caso aki.

For di e investigacionnan haci polis a divulga cu e homber no tin niun laso cu e circuito criminal y cu polis ainda no sa kiko lo ta e motibo di e secuestro.

Diaranson den careda di 12’or y 45 di marduga, e homber a wordo baha for di un auto den un bario na Delft. E homber a pasa di un cas pa otro ta primi bel di e casnan pa mira si un hende por habri porta pe, na dado momento un señora a habri porta di su cas y a bin topa cu e homber basta maltrata, tur spanta y door di a wordo maltrato e homber a tabata herida. E homber tabata lora cu ducttape rond di su brazanan y cabes. E homber tabata asina cansa y herida, cu e la sak den otro na momento cu e señora a habri porta p’e. E unico cos cu e homber tabata suplica e señora tabata pa please yama polis di biaha, ” Mi a wordo secuestra.”

E señora no a compronde kiko tabata pasando, pero mesora a dicidi di yama polis. Na yegada di polis e señora a bay duna e homber un deken pa e tapa su curpa, pero polis a pidi’e pa no haci esaki pasobra asina e lo por kita e spoornan for di riba curpa di e victima. Segun e señora e por a nota un desesperacion grandi den wowo di e victima y alabes un alivio na momento cu polis a yega. E homber a wordo hiba hospital pa e ricibi tratamento medico pa su heridanan.

For di investigacion a bin confirma cu e persona cu a wordo secuestra tabata robes.  E persona cu e secuestradonan lo a haya ordo pa secuestra ta completamente un otro persona, kende cu despues di a tende di e secuestro a core bay polis y a entrega su mes. Tambe polis a informa cu e secuestro ta relaciona cu un cargamento di 1899 kilo di cocaina cu a wordo intercepta riba waf di Antwerpen, Belgica.

Polis ainda ta investigando e caso aki, varios sospechoso a keda deteni caba, pero e tres personanan directamente envolvi cu e secuestro ainda ta wordo busca pa husticia Hulandes.  Pa yuda soluciona e caso mas liher cu ta posibel, Polis Hulandes cu ta traha hunto cu medianan Hulandes, mesora a duna imagennan di e secuestradonan cu ta wordo busca na prensa, pa asina logra pone man riba e tres secuestradonan mas lihe cu ta posibel.

Polis Hulandes ta pidi e pueblo si nan conoce e tres personanan aki of sa nan paradero pa mesora tuma contacto cu polis.