“Un rato pasa nos a huramenta como minister di Gabinete Wever-Croes II. Un coalicion entre Partdo Movemiento Electoral di Pueblo MEP y Partido Raiz.
Despues di proceso di eleccion adelanta, dia 25 di juni Aruba a vota. Aruba a vota pa un coalicion pa sigui enfrenta e retonan grandi cu nos pais ta pasando aden.
Entre sr. Ursell Arends y mi persona nos a tuma e encargo di forma un gobierno y den e proceso ey nos a scoe pa reuni cu mas tanto stakeholders cu ta posibel.
Nos a reuni cu mas cu 100 stakeholders, pa asina por scucha di tur kico ta biba den comunidad awor cu nos ta saliendo di e pandemia. Loke a hala mas atencion ta e optimismo, e speransa y e deseo di cada un di e stakeholdernan aki, di ta parti di e solucion.
Y esey ta locual cu nos kier logra den Gabinete Wever-Croes II, pa hunto nos busca solucion pa e retonan. Pasobra Aruba mester di nos tur.
Pueblo di Aruba a vota pa un coalicion y nos mester respeta esaki y dun’e su balor. Un coalicion kiermeen cu cada Partido mester sirbi y traha cu Sinceridad, Transparencia, Colegialidad, Creatividad, Pasion y Diciplina pa logra lo maximo pa nos pais. MEP y RAIZ ta cla y a tuma e Timon di Gobernacion pa traha pa Aruba mei mei di e lama turbulento cu ta afectando Aruba henter nos Planeta.
Mi ta bisa esaki pasobra cu e Pandemia di Covid a devasta no solamente nos isla, pero henter mundo. Tur pais na mundo na momentonan aki ta para dilanti retonan grandi; pa sigui proteha y salba bida y alaves rescata economianan y cuponan di trabao. Esaki no ta facil.
Covid a mustra nos tambe, nos debilidadnan, personal, salud, nos sistema di defensa, pero tambe nos por a mira e debilidadnan cu tin den gobernacion y den nos comunidad en general.
Aruba mester bira un pais mas resiliente cu por resisti e consecuencianan di cambio climatico, retonan di salud y pa resisti golpinan economico. Solamente trahando hunto; gobierno y comunidad, nos por logra. Pasobra Aruba mester di nos tur.
Gabinete Wever Croes II lo traha pa:
- Aumenta nos entrada, controla nos gastonan y stabilisa nos nos finansas publico,
- Sigui mehora cuido di salud di nos comunidad
- Restablece confiansa di paisnan rond mundo den nos economia y especialmente den nos Turismo; cu Aruba ta un pais safe, bunita y di calidad pa nan bin sigui inverti y sigui bishita, asina creando mas cupo di empleo
- Trece trankilidad den e area di enseñansa, y Innova nos educacion,
- Sigui duna maximo atencion pa resolve nos retonan social, especialmente na salud mental di nos hendenan, y trece mas siguridad
- Sigui cuida nos medio ambiente y naturalesa na forma ordena; e introduccion recien di e Plan di desaroyo Teritorial cu Reglamentacion lo ta e guia, pasobra nos mester cuida nos naturlalesa
- Nos lo enfoca riba relacionnan den Reino pa crea posibilidadnan nobo pa nos pais y paisnan ruman
- Y nos lo cementa e fundeshi di bon gobernacion y integridad cu nos a cuminsa construi e ultimo añanan.
Nada ta bin di mes, tur logro ta exigi participacion, esfuerso, dedicacion di nos tur. Nos a demostra den e crisis cu nos por ta solidario y ta e solidaridad aki cu curashi, diciplina y sacrificio a yuda nos sali padilanti. Aruba ta ehempel pa hopi otro pais den region. Y asina nos a gana confiansa y nos lo sigui gana confiansa. Pa logra esaki nos mester uni forsa. Pasobra Aruba mester di nos tur.
Mi kier finalisa cu un quote di JF Kennedy: Partnership no ta un postura pero un proceso continuo cu ta crece mas fuerte y efectivo cada aña segun nos ta traha hunto pa e causa comun.
Y ta e base aki di solidaridad patriotico nos lo pone den practica den e gobierno nobo di MEP – RAIZ. Aruba tin cu bira un pais resiliente, sigur, innovativo, sostenibel y feliz pa biba. Awor cu nos tin Gobierno, awor pueblo por tin pleno confiansa cu hunto paso pa paso nos atencion completo lo ta pa supera e olanan di e lama turbulento di temponan aki.
Pueblo por tin confiansa cu e coalicion aki di MEP y RAIZ cu a huramenta awe lo traha cu Respet pa otro y integridad pa logra e Progreso, Bienestar y Felicidad cu nos pueblo ta anhela y merece”.