ORANJESTAD – Pami Ta un honor grandisimo pa por logra haya e oportunidad un biaha mas pa sirbi mi pais como minister di turismo y salubridad publico pa un di dos periodo. Minister Dangui Oduber cu a caba di huramente como minister di Gabinete Wever Croes 2 como minister di turismo y salubridad publico y ta sinti sigur un emocion grandi pa por sigui contribui y sirbi pais Aruba cu tur e talentonan cu nos creador a dune.
E ultimo 2 anjanan tawata e anjanan di mas dificil den historia di nos pais. Nos pais mescos cu tur otro pais den mundo mester a maneha e pandemia di Covid-19 cu keto bai tey presente ainda na Aruba. No obstante e situacion hopi dificil gobierno di Aruba a haci tur loke tawata den su alcanse pa purba maneha e crisis na un mihor forma posibel. Pueblo di Aruba a bai urna electoral dia 25 juni 2021 pa scohe su gobierno nobo. Partido MEP a resulta e ganador di e eleccion 2021 y na mes momento e partido di mas grandi di Aruba cu 9 asiento. E electorado a vota pa un coalicion y despues di un proceso habri, serio y transparente partidonan MEP y Raiz a yega na un acuerdo di gobernacion pa forma e siguente gobierno, Gabinete Wever Croes 2.
E gobierno nobo aki lo bai percura pa tin trankilidad, stabilidad y mas importante progreso pa cada ciudadano. Nos ta sinti nos mes yama pa pais Aruba progresa.
Nos tin un gobierno solido cu ta comprometi pa percura pa nos recupera nos turismo, recupera nos economia, diversifica nos economia y crea un bon balansa entre desaroyo y naturalesa. Mi ta agradecido y contento di por forma parti di e coalicion aki. Agradecido na nos creador, na cada un di mi votadornan, mi sostendornan, mi amigonan y famianan pa por haya e oportunidad aki un biaha mas.
Nos ta keda comprometi pa sigui traha duro tur dia pa por sirbi nos pais. Nos maneho y vision lo ta dirigi pa saca Aruba for di e crisis creando oportunidadnan nobo.
Aruba ta mi isla, e isla cu nos lo traha duro pe y E gobierno nobo aki lo tey pa sirbi pueblo na e mihor forma posibel.
Danki Aruba pa boso sosten y cu nos creador por guia nos y duna nos e inspiracion pa progreso di nos pais.
