Rasmijn: “Speed mester bisa con e la yega na e radionnan di polis y Marko no a bisa e berdad“
Oranjestad:
Diamars mainta Hof a atende cu e caso Kinikini, di cual e agente policial Rasmijn a apela, den e caso a aki varios testigo a wordo pidi den corte, entre otro e dos reporteronan di 24ora.com, Nelson Andrade y Marko Espinoza, tambe un tal Dirksz y ex hefe di BIZO sr. Winklaar.
E prome testigo cu a wordo scucha den corte tabata e inspector di polis Winklaar. Hof a bis’e pa e papia loke e sa y Si e no ta corda of no sa sigur pa bisa esaki tambe. Winklaar a bisa cu tabata un berguenza loke a sosode, den un departamento caminda cu ningun hende mag di haya charger y radio. Nan a kere cu un colega lo a coy un charger y lo trece bek, pero esaki nunca a sosode. E cos a bira mas serio ainda, ora cu un radio di polis a disparce. E la bisa, cu su ruman Winklaar cu tambe ta polis lo a entrega un keho di un radio y un charger perdi. Tur radio ta asigna na un polis. Segun su persona un persona a keda sin bisa cu un charger ta perdi, ora a bay busca e formulario cu ta bisa cu e charger ta perdi, e formulario tambe a perde. Winklaar no ta kere cu lo tabata tin cambiamento di radio. Winklaar a mustra cu na comienso cu e radionan nobo a yega, tabata tin bruhamento, pero despues a regla esaki y cada polis tin su radio, esaki lo a tuma luga na fin di 2015. Tambe Winklaar a mustra cu porta di oficina di Rasmijn, Winklaar y un otro tabata na yabi, cu ningun hende no por drenta. Na dado momento ora cu e tabata sinti falta di e radio, e la drenta den e oficina di Rasmijn riba orden di Comisario di polis.
Rasmijn despues di a scucha e testigonan, a bisa Hof cu aparentemente Speed tabata tin diferente radio. Rasmijn ta lamenta cu Speed no a bisa con e la yega na e radionan. Pa loke ta trata Marko Espinoza, e ta lamenta tambe cu Marko no a bisa e berdad. Rasmijn a bisa cu nunca e la duna Speed, ni a accepta radio for di Marko.
E la bisa cu locual Winklaar a bisa no ta berdad. E la bisa cu e mix up tabata entre Rasmijn y Dirksz, e mix up tabata entre Winklaar, Rasmijn y un otro colega.
Hof a mustra cu for di investigacionnan haci, e radio cu nan a haya ta di Rasmijn . Segun Rasmijn e P-012 pa hopi tempo e no tabata tin e mas den su poder. Hof a mustra cu Rasmijn a bisa cu Speed a pidi’e pa informacion di polis y despues a resulta cu Speed tin e radio di Rasmijn. Rasmijn e keda para riba cu e no a duna Speed radio di polis y no sa nada.
Rasmijn a splica hof cu e la perde su trabou como polis y cu e tin cu traha como security.
Procurador General a bisa cu Rasmijn ta wordo acusa cu e la pasa su radio y charger na un otro persona y cu Rasmijn a wordo haya culpabel y condena. Segun Procurador General, pa periodistanan ta hopi interesante pa haya sa di casonan policial. Periodistanan ta busca contacto di tur forma cu polis pa asina yega na sucesonan. Esaki segun Procurador General esaki ta un asunto hopi lamentabel.Segun su persona nan por stroba e investigacionnan. Si nan tin radio di polis of ta scucha combersacionnan secreto cu por perhudica investigacion. Rasmijn a bisa cu e tabata tin su radio cun’e y pa un periodo e mesun radio aki tabata perdi. SI scucha testigonan, Marko Espinoza a confirma loke e la declara na Landsrecherche cu ta for di Speed e la haya un radio y charger, anto cu Speed a bis’e hiba e radio pa Rasmijn. For di GPS di e radio por a mira claramente cu e radio P-012 tabata na cas di Marko. Considera esaki malversion di radio di polis. Procurador General a mustra cu Rasmijn mes lo a declara na Landsrecherche cu Speed a yega di pidi’e pa un radio y charger. Procurador General ta haya legalmente prueba cu Rasmijn ta culpabel y ta pidi pa confirma e castigo cu Rasmijn a wordo condena pe.
Abogado mr. Illes a bisa Hof cu Rasmijn ta keda para riba cu e no a facilita Speed cu radio di polis, ta un hecho cu na december 2015 e radio a disparce, e ta conclui cu for di tempo ey Marko tin e radio, tambe ta straño cu ta na Marko su cas so a registra e radio aki y no na cas di Rasmijn of na su oficina. Rasmijn no ta desmenti cu su radio tabata den poder di otro, pero no sa di esaki. No por conclui cu ta Rasmijn ta esun cu a facilita Speed cu e radio. Rasmijn ta desmenti cu Marko a entrega na dje un radio di polis. Marko a bisa cu e la haya e radio for di Speed, pero no sa for di ken Speed a haya esaki. Speed den Corte a bisa cu e no ta corda ken a dun’e e radio. Tambe e la mustra cu loke Winklaar ta bisa, cu a registra e radionan no ta corecto. Rasmijn a mustra cu tabata tin bruhamento di radio. Rasmijn tabata tin e radio di e ruman Winklaar, un otro colega M. tabata tin e radio di D., e la mustra cu ta na 2017 pa 2018 a notifica cu e radio a perde. E ta kere cu ta na mei 2017 a cuminsa cu investigacion y ta e tempo ey tabata tin bruhamento di radio. E ta kere cu entre 2016-2018, e radionan tabata bruha. Rasmijn no tabata tin su radio cual e tabata laga den su oficina, caminda otronan por a yega na su radio. Segun Rasmijn nan a hunga falso cun’e y a tira culpa riba dje. Winklaar a bisa cu tabata tin un bruhamento entre Rasmijn y Dirksz, pero esey no ta corecto. Un otro polis M. a bisa cu e bruhamento tabata entre Winklaar y Rasmijn y M. E radio P-015 ta di BIZO cu ta di ruman di Winklaar, cu ta e agente policial A. Winklaar y e radio aki ta perdi. Segun su persona e ta haya cu tabata tin otro scenario cu radio a perde. Pakiko e GPS no a registra ora Rasmijn tabata tin e radio den su poder. E tin duda den e GPS, e hecho cu P-015 tabata perdi y pakiko na e mesun manera P-012 a perde. No ta haya cu por papia aki di malversacion, pasobra ningun momento Rasmijn a pasa su radio pa un otro persona. Abogado mr. Illes a pidi Hof pa declara Rasmijn liber.
Hof a cera e caso aki bisando cu nan lo bay studia e caso y por spera un sentencia dia 11 di october proximo.