Home Corte Fiscal ta exigi pa mishimento y violacion di 8 dama, 5 aña...

Fiscal ta exigi pa mishimento y violacion di 8 dama, 5 aña di prison y prohibicion di 8 aña pa traha como masahista

SHARE

Oranjestad:
Diabierna ultimo a tuma lugar den corte e caso di R. Carti.  Carti ta wordo acusa di mishimento y violacion di 8 dama. Esaki lo a pasa durante cu su persona tabata duna e damanan aki masashi. Carti a desmenti tur e acusacionnan aki contra su persona.

Fiscal a bisa Hues cu apesar cu Carti a keda keto, e tabata masashi e victimanan por ta no a mishi cu nan parti intimo intencionalmente, pero Fiscal a mustra cu 8 dama a haci denuncia cu Carti a penetranan cu dede, of a mishi cu nan pecho.

Despues cu keho a wordo entrega na departamento di Salubridad, e caso a cuminsa. E ta haya cu a keda prueba cu Carti a mishi cu e damanan. Fiscal a mustra ariba e denuncianan di e damanan, kendenan ta bisa con durante masashi Carti lo a mishi cu algun di nan, nan parti intimo. Pa motibo di berguenza of di a keda den shock a pone cu despues di hopi tempo, e victimanan a haci denuncia.

Hues a mustra cu un victima na november 2020 diferente biaha a bay masashi, e la bisa cu Carti na dado momento a masashi te memey di su pianan, na momento cu e tabata masashi su bilnan, segun e victima, Carti a mishi cu su parti intimo diferente biaha. Segun e victima e la paraliza y no a bisa nada. Ora e la caba e la bay pafo y a bisa su mama cu e no ta bay mas cerca e maniac ey. Carti a splica cu e victima tabata tin un problema cu un musculo di pia, unda e mester a bay hopi cerca di su parti intimo, pero niun momento a mishi cu su parti intimo.

Un otro victima 2019 a bay diferente biaha pa masashi. E la bisa cu e ultimo biaha si e ta haya cu Carti a mishi cu su pechonan y tambe a bay hopi cerca di su parti intimo. E tabata haya esaki uncomfortable y no a bay mas cerca dje. Carti a declara cu e victima tabata tin problema cu lomba y nek door di un accidente. E la splica cu e la dun’e masashi na lomba, shouder y nek, tambe Carti a nenga di a mishi cu su pechonan.

Un otro victima a bisa cu na Februari 2012, Carti lo a penetr’e ora cu e tabata drumi riba un cama. Esaki a sosode masha liher y cu Carti su señora lo kier a habri e porta, pero e porta tabata na yabi. Esaki tambe a keda desmenti pa Carti. Segun Carti, ta normal cu hopi patient ta pega soño. Tambe e la bisa cu su señora no tabata na cas. Segun Carti cu esaki ta un storia inventa. Carti a keda para riba cu ningun momento esaki a sosode.

Un otro victima ta bisa cu na 2014, Carti lo a mishi cu su pechonan. Carti a declara cu e victima tabata sufri di dolor di lomba. E la splica den corte cu e la masashi e dama na su lomba y ora a bay pa su pecho ariba. E victima a reacciona bisando kiko e ta haciendo. Ora Carti kier a splik’e, e la lanta bay. Segun Carti e tabata masashi su trapezium y mester a haci e parti di dilanti tambe.

Fiscal ta haya cu Carti a bay di mas den masashi door di mishi cu parti intimo di hende muher. E ta haya cu den e caso aki por mira cu den e declaracionnan tin puntonan escencial cu ta mustra e forma con Carti a haci. Ningun di e victimanan a duna Carti permiso pa bay mishi na nan parti intimo. E damanan tabata mustra cu Carti tabata bay cu su man memey di nan pia ora e ta masashi nan pia. Tabata tin algun cu a bisa cu Carti lo a hinca dede den nan parti intimo y otronan tabata bisa cu e tabata frega na nan parti intimo. Tin cu a bisa cu e la mishi cu nan pecho.

Carti na su turno a splica cu ta door di e tecnica di masashi cu e ta usa, e ta bay cerca di e parti intimo, pero no a mishi cu nan. Segun Fiscal, hinca dede den parti intimo , segun hurisprudencia ta violacion, tin sentencianan den  Corte Supremo cu ta mustra esaki.

Fiscal ta haya Carti culpabel, pa loke ta trata di demanda di daño, e victimanan mester demostra kiko e demanda di dañonan ta. SI declara e caso no admisibel, por cuminsa un caso civil.

Castigo pid pa Fiscal
Carti a atacha integridad di e 8 damanan cu a pone confianza den su persona. 3 violacion y 5 mishimento. No por tolera esaki. Si despues di tempo ta haci denuncia, lo por persigui e sospechoso. Fiscal a menciona sentencianan di casonan na Hulanda. E ta exigi 5 aña di prison y prohibicion di 8 aña di traha como masahista.

Abogado defensor mr. Carlo
Abogado mr. Carlo den su defensa ta mustra cu ta straño cu dos di e victimanan tambe a haci un denuncia por escrito. Esaki ta mustra cu nan posibelmente a cera cabes.

Tambe e abogado a sigui bisa cu cuater di e ocho victimanan a declara cu nan a paralisa ora cu Carti a mishi cu nan. E dos damanan cu a bisa cu den e azeta tin droga, nan no tabata cerca Carti, pero cerca un otro fysioterapista y a bisa cu e otro fysioterapista ta uza un otro azeta. Ta mustra cu nan a wordo manda pa un of mas persona pa haci denuncia. Tambe e abogado a bisa den corte cu tur cos ta mustra cu despues cu 24ora, a publica di e detencion di Carti, diripiente un cantidad di denuncia a drenta na KZP.

Hues lo dicta sentencia dia 8 di oktober 2021.