Home Politics Prome Minister Evelyn Wever-Croes: TRASPASO DI CARTERANAN DI PROME MINISTER PA...

Prome Minister Evelyn Wever-Croes: TRASPASO DI CARTERANAN DI PROME MINISTER PA SR. URSELL ARENDS

SHARE

Prome Minister Evelyn Wever-Croes ta sigui cumpli cu su deber di traspaso di e trabounan y cartera cu tabata bou di su encargo durante Gabinete Wever-Croes I, pa e ministernan nobo. 

 

E cartera di Dierenwelzijn, Naturalesa y Medio Ambiente, Serlimar, y Raad van Ouderen a ser traspasa pa sr. Ursell Arends cu lo ta encarga cu e carteranan aki durante e proximo gobernacion. Durante su maneho di e carternan aki den Gabinete Wever-Croes I, Prome Minister a traha hopi duro pa logra cosnan bunita pa e carteranan aki y ta convenci cu sr. Arends lo sa di implementa su propio vision y bin cu ideanan nobo pa asina logra hopi mas riba e terenonan aki. 

 

Apesar cu Aruba ta enfrentando retonan grandi riba tur tereno, e tipo di topiconan aki no mag di wordo lubida den e proximo gobernacion. Bienestar di nos animalnan ta un topico cu Aruba ta ricibi hopi critica riba nivel internacional y ta rekeri hopi atencion. E ta di suma importancia pa comunidad ta consciente di esaki y duna di nan parti pa cuida nan animalnan y busca un animal solamente si por cuid’e debidamente. 

 

Naturalesa y Medio Ambiente a ser saca for di bou di Infrastructura pa e siguiente gobernacion pa asina por duna e tema aki mas atencion. Prome Minister tin tur confiansa cu e paso tuma aki ta den bienestar di conservacion di nos naturalesa. 

 

E compania Sui Generis, Serlimar tambe lo ta bou encargo di sr. Ursell Arends y ta un compania cu ta den surseance van betaling. Hopi importante bayendo padilanti ta pa busca solucion pa loke ta trata e tema di desperdicio, no solamente e desperdicio na dump di Parkietenbos pero tambe e desperdicio likido cu ta RWZI. Mirando e importancia di e topiconan aki, nan lo wordo adresa den e siguiente simannan. 

 

Aruba tin problema di “vergrijzing” cual ta motibo pakico gobierno mester pone mas atencion riba e tema aki. Na comienso di Gabinete Wever-Croes I, e idea a surgi pa bin cu un comision, Raad van Ouderen pa yuda atende cu e tema y retonan cu nos grandinan tin. Un comision asina lo resorta bou SER cu lo atende cu e temanan aki. Trabounan preparatorio pa cu esaki a wordo haci durante Gabinete Wever-Croes I pero nada a wordo concretisa. Prome Minister tin confianza cu sr. Ursell Arends lo sa di concretisa esaki pronto den e proximo gobernacion.