Home Local Departamento di Progreso Laboral – DPL ta recorda dunadornan di trabou pa...

Departamento di Progreso Laboral – DPL ta recorda dunadornan di trabou pa haci uzo di e formulario di Arbeidsmarktregistratie 2021 prome cu fin di September

SHARE

 

ORANJESTAD – Bou e departamento di Progreso Laboral (DPL) ta resorta e tres departamento manera Arbeidsbemiddeling en Re-integratie (Jobcenter), Arbeidsmarktregistratie (AMR) y tambe Advies Toelating Arbeidsmarkt (Admision).
E departamento di Arbeidsmarktregistratie (AMR) ta traha riba e demanda (lista di necesidad na personal) di dunadornan di trabou pa medio di e formulario di Arbeidsmarktregistratie.
Cu esaki DPL ta traha riba proyeccion entre demanda y suministro laboral pa e promixo aña, esaki ta sumamente importante pa asina DPL por traha di antemano conhuntamente cu scolnan, institutonan di educacion y dunadornan di trabou pa asina por produci y ofrece suficiente trahadornan local. Sin e formulario aki aproba un dunador di trabao no por haci e proceso conforme maneho na e otro departamentonan di DPL. AMR ta e prome paso cu tur dunador di trabou mester cumpli cune na DPL.  

Rekisitonan
DPL kier a haci un suplica na dunadornan di trabou pa yena e formulario di AMR 2021 mas specifico y completo posibel (yena via un computer). Semper tin e posibilidad pa e dunado di trabou haci adaptacionnan na caminda riba su lista di necesidad na personal. Cu adaptacionnan ta referi na, por ehempel esnan cu ta depende di proyectonan di trabou cu ta exigi mas personal of personalnan specifico cu ta dificil pa anticipa di antemano. Semper tin e posibilidad pa haci cambionan riba e lista di necesidad entrega pero si na un forma realistico.

Pa locual ta trata rekisitonan exigi pa entrega un formulario di AMR, tur esakinan ta poni riba e prome pagina di e formulario estilo “checklist”. E dunador di trabao mester cumpli cu tur e puntonan corespondiente na su sector laboral pa asina por entrega e formulario y haya aprobacion. Esnan cu ainda no a entrega nan formulario di AMR 2021 por haci esaki ainda te cu fin di September 2021. Normalmente mester a traha un cita via email pa haci entrega pero mirando cu ta yegando na e fecha final, entrante dialuna 13 di September 2021 mester entrega esaki personalmente na DPL (hardcopy). E grupo aki cu lo entrega di awo te cu fin di September 2021 no mester haci un cita. Orario pa entrega ta di 8:00 am te cu 11:30 am y di 1:30 pm te cu 3:30 pm. Por trece un copia di e prome pagina pa asina DPL stempel cu a ricibi e documentonan.  

Formulario
Pa por facilita e tempo di su clientennan y mirando e protocol di COVID-19, DPL tin e formulario aki disponibel riba su website: www.dpl.aw caminda un y tur por subi y download e formulario di AMR (PDF) cu ta cuadra cu su necesidad. Tene na cuenta cu tin cuatro diferente  formulario di AMR pasobra nan ta reparti den sectornan laboral manera Horeca, General, Limpiesa-Hardineria-Seguridad y Construccion. 

Formulario 2022
Entrante 1 di December 2021 lo cuminsa acepta e formulario di AMR 2022 cu lo ta obtenibel riba e website di DPL entrante e mesun fecha aki. Mester haci un cita online via email: dpl.arbeidsmarktregistratie@aruba.gov.aw pa asina haya un fecha pa entrega e formulario yena. Entrega lo mester sosode personalmente na DPL. 

Atrobe, e formulario lo ta disponibel pa download, print y yena (digitalmente, no ta acepta formulario yena na man) prome cu presenta na DPL. Mester yena e formulario completamente pa asina por tum’e den consideracion na DPL y tambe mester cumpli cu tur e rekesitonan stipula den e checklist.