Avenida Alo Tromp/ Kerkstraat: Diadomingo algo prome cu 8’or di anochi, presencia di polis a wordo pidi cu urgencia dilanti ex Panaderia Moderna den Avenida Alo Tromp, pa un caso di hit and run y menasa cu arma di candela.
Na yegada nan a bin compronde cu chauffeur di un Kia Rio color Blauw lo a bay reverse y a dal contra un Mitsubishi lancer preto. Ora cu e chauffeur di e Lancer a bay papia cu ne, e chauffeur di e Rio lo a saca arma y a menasa e chauffeur di e Mitsubishi Lancer.
Despues cu e chauffeur di e Kia Rio a menasa e chauffeur di Mitsubishi Lancer cu e lo los tiro riba dje, E chauffeur di e Kia Rio baha na awa.
Ora polis a yega na e sitio e chauffeur di e Kia Rio ya no tabata na e sitio mas. E agentenan a tuma tur datos y mirando cu e chauffeur tabata tin un arma di candela riba dje, mesora a cuminsa cu un buskeda pa su persona.
No a dura hopi cu polis a bin topa cu ne riba caminda banda di Belgiestraat, mesora a cuminsa un persecusion y na altura di e T kruising di Pos Abou, polis a logra par’e. Varios unidad policial a yega na e sitio y mesora nan a saca e chauffeur for di auto y a pone riba vloer.
E chauffeur tabata un conoci di husticia cu ta wordo considera un persona peligroso. Polis tecnico tambe a yega na e sitio, e arma a keda confisca y e investigacion ta canando su caminda
