Cas Marie, e centro di encuentro na Savaneta pa persona cu demencia y nan famia, riba dialuna 13 di September a celebra nan di 15 aniversario. Gobernador di Aruba, Su Excelencia Alfonso Boekhoudt, tabata presente como invitado na e celebracion.
Na su yegada, directora di Cas Marie, señora Lisette Does a ricibi Gobernador Boekhoudt. Señor Boy Escalona, un di e fundadornan, a combersa cu Gobernador splicando tocante e origen di Cas Marie y e desaroyo di e fundacion e ultimo 15 añanan. Despues di e combersacion señora Does a duna Gobernador un recorido door di e compleho.
Finalmente Gobernador a presencia un parti di e celebracion chikito tumando luga na Cas Marie.
Fundacion Cas Marie ta brinda diferente servicio cu e meta pa mehora e calidad di bida di personanan cu demencia y nan famia: servicio di pasadia, servicio di informacion, servicio di sosten y guia na famia of individual y servicio di test Neuro-psychologico riba peticion di specialista.Pa mas informacion por mira www.casmarie.com.
