Home Corte Hoben cu a sconde arma di homber cu a wordo tira mata,...

Hoben cu a sconde arma di homber cu a wordo tira mata, condena na 7 luna di prison

SHARE

ORANJESTAD – Awe mainta Corte den Promer Instancia a condena e hoben homber A.v.d.L.(19) na 7 luna di prison.

ARUBA NATIVE por a compronde cu esaki ta pasobra e tabatin e arma di e homber Ignacio cu a wordo tira mata na Januari 2021 na Pos Chiquito y tabatin un cantidad di marihuana na su cas. Tambe cu e tabatin un cellular cu ta procedente di ladronicia.

Ta asina cu durante un investigacion di Polis na cas di A.v.d.L., a confisca un arma di candela. Net ora Polis a yega na e cas, v.d.L. a tira e arma for di bentana. Polis a confisca e arma. A.v.d.L. a declara cu arma ey no tabata di dje sino e tabatin’e warda pa su amigo Ignacio. Na December 2020, Ignacio lo a duna v.d.L. e arma pa warda y na Januari 2021, Ignario ta wordo tira mata den un auto na Pos Chiquito.

Ademas v.d.L. tabatin un cantidad di marihuana na e cas y un I Phone cu a resulta di ta procedente di un ladronicia.

Fiscal a bisa Hues cu a keda legalmente proba posecion di arma. El a bisa cu e arma tabatin balanan aden. E arma tabata di un amigo di v.d.L., Ignacio. Fiscal ta haya cu v.d.L. a tuma un cellular cu ta bin for di ladronicia. Polis a haya e cellular aki na cas di v.d.L. Na opinion di Fiscal, e no ta haya v.d.L. complice di e ladronicia di e cellular pero si cu el a tuma e cellular. Esey ta haya cu v.d.L. ta culpable di incubrimento. Fiscal a sigui bisa cu tambe a haya 14.3 gram di marihuana, 5 mata seco y algun simiya.

Fiscal a exigi 10 luna di prison, di cual 3 luna ta condicional y un tempo di prueba di 3 aña. Fiscal a exigi pa e arma di candela, e droganan mester wordo destrui. El a pidi pa declara e demanda di H. no admisibel pasobra no ta v.d.L. a horta e cellular.

Hues, despues di a scucha e defensa a sera tratamento di e caso y a dicta sentencia di biaha. Hues ta haya A.v.d.L. culpable di posecion di arma di candela, posecion di cantidad di marihuana y incubrimento di un I Phone. Hues a bay di acuerdo cu e exigencia di Fiscal. Hues a condena A.v.d.L. na 10 luna di prison, di cual 3 luna ta condicional y un tempo di prueba di 3 aña. Hues a duna orden pa destrui e droga y e arma cu balanan.