Madrid, Spaña: Hugo Armando Carvajal” El Pollo” tabata wordo busca pa husticia Mericano, pa motibo di tabata colabora cu Fuerzas Armadas Revolucionarias de Colombia, (FARC) pa trafica droga pa Merca.
Autoridad spaño a detene diahuebs ultimo Hugo Armando Carvajal, miho conoci como El Pollo Carvajal, ex general Venezolano Chavista, kende desde november 2019, su paradero tabata desconoci y Merca tabata busk’e pa traficacion di droga y di a colabora cu Farc.
Fuentenan policial a informa cu detencion di Carvajal a tuma lugar den careda di 9’or y 15 di diahuebs anochi, ora di Spaña (3’or di atardi na Aruba). Esaki a sosode na un cas den caya Torrelaguna di Madrid. Polis Nacional den colaboracion cu agentenan di DEA a detene El Pollo Carvajal.
Hugo Carvajal tabata den un cas y tabata wordo protega pa varios persona. Segun fuentenan den e cas aki Carvajal tabata scondi y no tabata sali niun rato pafor di e cas.
Na april 2019 Hugo a wordo deteni caba na Spaña pa drenta e pais cu un pasport falso, pero na September 2019, Spaña a nenga su extradicion. Despues di a compronde cu Merca lo ta pidiendo su extradicion pa motibonan politico, y asina Hugo Carvajal a wordo laga den libertad.
El Pollo Carvajal tabata hefe di Inteligencia Militar di Hugo Chavez entre 2004 pa 2011 y su extradicion pa Merca a wordo pidi pa su vinculonan cu narcotraficantenan y di a raspa/horta e compania estatal di Petróleos de Venezuela. E general ta wordo considera un persona clave den e investigacionnan referente Chavismo, cu despues sigui pa Nicolas Maduro, cu a acus’e di traicion ora e la reconoce Juan Guaido na Februari 2019 como Presidente Interino di Venezuela.
Dia 23 di juli 2014, Hugo Carvajal a keda deteni na Aruba y esaki pa motibo cu e tabata un persona cu Husticia Mericano tabata buscando, pa su relacion cu FARC y tambe pa traficacion di droga.
Abogado mr. Chris Lejuez a representa Hugo den corte na Aruba, segun su abogado Hugo tabata tin inmunidad diplomatico. Carvajal tabata tin un paspoort diplomatico.
Hoofd Officier di e tempo ey Peter Blanken a splica cu su detencion tabata ariba un peticion formal di Estado Unidos, a base di un tratado cu Aruba tin cu Merca.
Diadomingo 27 di Juli 2014, Hugo Carvajal a regresa Venezuela despues di a wordo laga den libertad.
