Dia 9 di september Club Kibrahacha a celebra su 36 aniversario hunto cu su miembro, voluntario y ademas invitadonan. Club Kibrahacha a tuma e oportunidad aki pa introduci su logo nobo y tambe duna reconicimento na un voluntario cu a traha 35 aña na Club Kibrahacha.
Club Kibrahacha a introduci su logo nobo cu a wordo revela pa publico door di nos Promer Minister Evelyn Wever Croes y presidente di hunta di supervicion di Club Kibrahacha Berg Kamsteeg.
E logo nobo aki ta representa e vision nobo cu Club Kibrahacha ta bayendo aden como centro di actividad pa nos adulto mayor. E fundacion ta sigui inova y adapta su servicio pa asina sigui sirbi nos adulto mayor den nos comunidad. E logo nobo aki a wordo diseña door di Freeway Aruba.
E website nobo tambe a wordo inaugura pa nos Minister di Integridad, Naturalesa, Transporte y Cuido di grandinan, Ursell Arends. Ariba e website por wak informacion tocante tocante Club Kibrahacha y tambe tur e actividadnan cu ta wordo ofrece na e centro.
Durante e celebracion tambe a duna reconocimento na Sra. Irene Robles de Medina. Irene tabata un voluntario pa 35 aña na Club Kibrahacha. Pa comemora e momento aki Sra. Irene a ricibi e prome pin di Eric d’Arnault pa tur su añanan di servicio na e fundacion como voluntario di obra di man. Eric d’Arnault tambe tabata presente na e evento aki. Na aña 1983 Eric d’Arnault hunto monite di Aruba Rotary a inicia cu e projecto di Club Kibrahacha y ariba 9 di september 1985 Club Kibrahacha a habri su portanan oficialmente pa actividadnan.
Awor Club Kibrahacha ta brinda nos adulto mayor un variacion di actividadnan di movecion, arte, recreacion y workshop. Actualmente tin algun workshop y actividad cu ta tumando lugar pa asina mas persona por participa na e actividadnan cu tin.
