NOS PLAYANAN Y NOS CORDIALIDAD TA DESTACA!
ORANJESTAD – Oficina di Turismo Aruba (A.T.A.) ta ricibi otro grato noticia, cu e conocido revista Travel + Leisure (basa na New York cu un publicacion 12 biaha pa aña y 4.8 miyon lector) a nombra Aruba den tres diferente categoria.
E aña aki, e encuesta pa e famoso ‘World’s Best Awards’ tawata habri pa tur hende por a vota, entre dia 11 di januari 2021 pa dia 10 di mei 2021. Esaki, despues cu hopi destinacion a inicia pa bolbe habri nan fronteranan atrobe pa ricibi bishitantenan.
E miho islanan rond mundo, segun e criteria di lectornan di Travel & Leisure, ta e destinacionnan cu ta ‘instagram-perfect’, esun cu e bishitantenan lo soña di dje ora cu ta winter na unda nan ta biba y nan ta desea pa ta na un isla cu un dushi clima y awanan di lama blauw cu playanan blanco.
Naturalmente tin islanan asina rond mundo y cada uno tin su specialidadnan/interesnan specifico manera historia, cultura, aventura of kisas algo full diferente cu ta haci e destinacion destaca.
Tur aña Travel & Leisure ta puntra su lesadonan pa nan experiencia y comparti nan opinion y experiencia pa cu e luganan cu nan ta bishita, sea ta ciudad, isla, crucero pero tambe aerolinea, spa y mas.
Asina e lectornan di Travel & Leisure ta evalua den e caso di destinacionnan, e actividadnan, atraccionan di e naturalesa, playanan, culinario, cordialidad/amabilidad y naturalmente e balor en general di e destinacion.
Entre e top 25 islanan den Caribe, Aruba a sali e di tres isla como mas gusta unda a pone enfasis riba Aruba su playanan, su hendenan amabel y cu hopi cos (actividad) aki na Aruba ta serca di otro.
Den e top 25 islanan mundial, Aruba a sali number 18.
Den e top 25 resortnan den Caribe, Aruba a bolbe haya fama mundial, unda na e di 12 luga, Bucuti & Tara Beach resort a wordo menciona.
Pabien Aruba! A.T.A. ta felicita tur esnan cu ta yuda pa nos isla sigui progresa cu e logro aki y ta pidi un y tur pa proteha nos recursonan natural y cultural, incluyendo nos calor humano, pa asina e sector turistico por sigui prospera y sostene nos pais.
-FIN-