Diamars mainta, Prome Minister Evelyn Wever-Croes a ricibi bishita di Dr. Dolores Lewis di Kiwanis Division 26. Kiwanis ta un organisacion internacional cu ta yuda comunidadnan den diferente area. Pa mas di un siglo, Kiwanis ta brindando muchanan e oportunidad pa siña, experimenta, soña, crece, triunfa y prospera.
E mision di Kiwanis ta pa empodera comunidadnan pa haci di mundo un miho luga marcando un diferencia duradero den e bida di muchanan. E vision di Kiwanis ta pa haci un impacto positivo den comunidadnan di henter mucho pa asina un dia tur mucha lanta den comunidadnan cu ta kere den nan, ta cuida nan y ta brinda nan e apoyo cu nan mester den nan caminda pa un futuro briyante.
E mision y vision di Kiwanis ta cuadra totalmente den e mision y vision di Gobierno di Aruba. Pa Gabinete Wever-Croes I y II, nos muchanan ta central. E desaroyo di nos pais ta depende riba famianan fuerte, resiliente, flexibel y stabiel. E muchanan cu ta guia door di norma y balornan sano na cas y den comunidad lo crece y florece den adultonan ekilibra y responsabel. Maneho Social den un pais ta di suma importancia y ta stimula cu cada ciudadano y cada famia aki na Aruba por sinti nan mes bon.
Gobierno tin como tarea pa yuda e famianan vulnerabel, cu no por crea tur condicion optimal pa asina lanta e muchanan y proteha e miembronan vulnerabel den famia y comunidad.
Prome Minister Evelyn Wever-Croes a gradici Kiwanis pa nan bishita na unda nan a comparti nan mision y nan vision y a intercambia puntonan di bista hopi importante na fabor di nos muchanan y famianan.
