Home Corte E motibonan pa VI(voorwaardelijke invrijheidsstelling, libertad condicional) di preso L.

E motibonan pa VI(voorwaardelijke invrijheidsstelling, libertad condicional) di preso L.

SHARE

Corte Comun di Husticia a recientemente trata e keho di e preso E.G.C.L. contra pospone su VI (voorwaardelijke invrijheidsstelling, libertad condicional) te 3 di november 2021. Corte Comun di Husticia a declara e keho sin base, loke kier meen cu L. lo mester keda den prison te e dia ey.

L. ta den prison desde 2009. El a wordo condena na december 2009 pa asesinato triple riba 4 di april 2008.

Un preso cu a sinta dos tercer parti di su castigo incondicional, por bin na remarke pa wordo poni den libertad condicionalmente. Colegio Central di Reclassering a dicidi riba 20 di juli 2021 cu no tin contra-indicacionnan pa e VI di L. y a conseha pa pon’e den libertad bao condicionnan especial. Riba 29 di juli 2021 e Colegio a conseha Minister di Husticia pa pospone e fecha pa duna e team cu ta trata L. y Reclassering mas tempo pa por cumpli cu e condicionnan especial. A keda dicidi e ora pa pospone e VI di L. te 3 di november 2021.

Minister di Husticia ta legalmente autoriza pa pospone of kita un VI si en caso hasta dor di pone condicionnan, e seguridad di otronan of e seguridad general di personanan no por wordo garantiza. Minister a pasa e autoridad aki pa Ministerio Publico. Corte Comun di Husticia a huzga recientemente cu e uso di e autoridad ey pa pospone e VI (pa motibo cu no acumpli ainda cu e condicionnan especial pa garantiza seguridad di L. y di comunidad), ta razonable.

Den e decision tuma den nomber di Minister, a keda poni cu KIA, e team cu ta trata L. y Reclassering lo sigui traha riba e plan di tratamento di L. y lo presente pa mas laat 15 di oktober 2021 na e Colegio. E Colegio lo bolbe saca un conseho na Minister tocante e fecha di VI di L.