Home Politics Segun Booshi Wever: GOBIERNO NOBO LO TA COMPLICE DEN E CORUPCION DI...

Segun Booshi Wever: GOBIERNO NOBO LO TA COMPLICE DEN E CORUPCION DI E INCINeRATOR CHIKITO OF LO PARA PA INTEGRIDAD?

SHARE

Recientemente mi persona a ricibi un carta di OM den cual e Procurador General ta disculpa su mes cu nan no a notifica mi persona cu OM a pasa mi denuncia, entrega contra señor O. Oduber tocante e actonan coruptivo den e compra di e incenirator chikito, pa Landsrecherche. Alabes ta menciona cu no  por bisa mucho al respecto pasó tin un investigacion penal contra sr. Oduber andando. Obviamente esaki kiermeen cu mi denuncia por ta forma parti di e acusacionnan contra sr. Oduber den e “Flamingo-zaak”!

Hopi a kere cumi acusacionnan no tin base, pero e hecho cu OM a mand’e pa “landsrecherche”, obviamente nan tambe ta di opinion cu ta bale la pena pa haci un  investigacion al respecto. 

 

Den e caso di “IBIS” a bin hopi cla dilanti cu ta condenabel cu NINGUN hende cerca di e minister concerni NO a lanta un “red-flag” pa alerta e minister, cu loke cu e ta haciendo ta incorecto. 

Den e caso aki, no solamente e consehero principal di O. Oduber deliberadamente NO a lanta e “red-flag”, pero pa colmo como  recompensa pa NO a lanta e “red-flag” el a haya  un funccion importante como consehero di nos Minister Presidente.  E actitud di NO lanta e “red-flag”, den mi concepto, ta un indicacion cu por lo menos e persona ta co-responsabel cu nos pueblo a wordo perhudica y obviamente ta sumamente condenabel.

Aparte cu e procedura encamina den e caso aki ta yená cu actonan coruptivo,  te awe ainda e incinerator aki ta NO ta funcionando.  

 

Lamentablemente un paar di siman pasa e Minister Presidente demisionario di Aruba a regala CTC un contracto miyonario SIN ningun clase di DESTAHO! Pa colmo usando argumentonan sin base y yena cu mentiranan. Y esaki ta un acto penal conforme nos Codigo Penal. Ta pesey den mi carta di dia 23 di juni 2021 mi a pidi OM pa involvi tanto e director di DOW y e Minister Presidente, cu a otorga un sponsor di O.Oduber un  regaldo miyonario di por lo menos  15 miyon bubu, den e investigacion. Ta pesey mi lo haci entrega di un otro carta na OM pa recorde cumi a haci denuncia riba e actonan contra nos codigo penal di tanto e director di DOW como e Ministro Presidente.

 

Ta di spera cu e gobierno nobo, cu tur dia ta papia di integridad, para e “miskoop ” corupto aki. Bira cara pa esaki, (mescos cu e consehero principal di O.Oduber a haci) ta nifica cu nada a cambia y cu ta e pueblo di Aruba un biaha mas lo bay paga miyones pa algo cu no ta sirbi, djis pa complace cu e sponsor di O. Oduber. 

Haciendo esaki  e gobierno nobo TAMBE por ser categoriza como uno NO-INTEGRO!

 

Miembro di Partido UPP

Booshi Wever

5 september 2021