Home Corte Hof a tuma decision Eugene Lampe no ta haya libertad condicional...

Hof a tuma decision Eugene Lampe no ta haya libertad condicional awor

SHARE

ORANJESTAD – Awe den oranan di mainta, Hof di Corte Superior a dicidi cu Eugene Lampe no ta haya libertad condicional awor.

Aruba Native por a compronde cu Eugene Lampe a cuminsa un caso contra e decision di Minister di Husticia, kende a dicidi cu Eugene no ta bay liber dia 5 Augustus 2021.

Siman pasa diahuebs Hof di Corte Superior a trata e reclamo di Eugene Lampe. Eugene a wordo hiba Corte y el a expresa di ta desapunta cu e no a haya su libertad condicional dia 5 Augustus 2021.

Minister di Husticia, despues di a haya conseho di tanto Reclasering como psychiater, a dicidi cu ta bay haci un evaluacion y na November 2021 lo mira si e ta haya e libertad condicional. Minister di Husticia kier pa tin un plan completo con ta bay atende cu Eugene ora e haya libertad condicional. PG a bisa Hof cu a acerca un psychiater di Curacao pa traha un plan di tratamento y cu Reclasering ta envolvi. El a bisa cu e luna aki e plan lo mester ta cla pa e comision di KIA evalua esaki.

Eugene a asesina na forma cruel su mama, su tata y su ruman den nan cas na Macuarima. E caso aki a shock henter Aruba. E unico miembro di famia cu ta na bida, ta e ruman homber. El a wordo condena na 20 aña di prison y awor, despues di 13 aña sera den KIA, e kier haya su libertad condicional.

Eugene a bisa e tres Huesnan cu ta forma Hof, cu el a comporta su mes durante 13 aña den KIA. El a bisa cu e no ta un peliger. Segun Eugene, por ta hendenan ta preocupa pa cu su forma di haci pero nan no a mira con el a cambia. Eugene su intension ta pa bay biba na e cas na Macuarima.

Awe den oranan di mainta Hof di Corte Superior a mail e decision pa tanto Ministerio Publico como e abogado mr. Lejuez.

Aruba Native por a compronde cu Hof a declara e reclamo di Eugene contra e decision di Ministerio di Husticia, no funda. Esey ta nifica cu Eugene ta keda sera den KIA pendiente di e plan di tratamento pa asina na November 2021 e lo por haya e libertad condicional bou condicionnan estricto.