Home Police Spookrijder femenino bou influencia riba Green Corridor a ranca un palo di...

Spookrijder femenino bou influencia riba Green Corridor a ranca un palo di lus y un borchi trafico

SHARE

Balashi: Diasabra algun minuut prome cu mey anochi, polis ta wordo manda cu urgencia riba green corridor pa un auto cu a ranca un palo di luz.

Na yegada di e patruya nan a bin topa cu un Nissan March Shinishi A 64748, cu hopi daño material, e auto tabata para cara pariba riba e caminda di direccion contrario. Tambe nan a bin topa cu un borchi di trafico y un palo di luz completamente ranca.

Na momento cu nan a acerca e auto, nan a bin topa cu un dama tras di stuur, e dama tabata basta bou influencia, cu e no por a ni para riba su dos pianan. E agentenan policial mesora a pidi pa un transportwagen.

Mientras e dama tabata wardando den auto, e la pasa man pa un thermo y tabata bebiendo for dje. Nos no por bisa si ta awa of cualke otro likido.

Na e sitio nan a bin compronde cu e dama tabata asina bou influencia cu e la drenta e rijstrook di trafico contrario y a bay straight ariba (spookrijder), e la baha caminda kibra un palo di luz y un borchi di trafico cu a keda benta riba caminda. Tambe polis a bin constata cu e auto, no ta di e dama pero cu e lo a huur e auto aki for di un otro persona. Un takelwagen a yega na e sitio y a hala e auto par’e riba e tereno banda di Drive-In.

Transportwagen di polis a busca e dama y a transport’e pa warda di polis na Santa Cruz. Aki por mira un biaha mas con Alcohol ta hinca hende den problemanan inespera, e dama aki awo tin debenan grandi cu e mester bay cumpli cu ne.