L.G. Smith Boulevard, rotonde Las Americas: Diadomingo den careda di 12’or y mey di marduga, un patruya di polis a mira con un Hyundai Accent shinishi scur, biniendo di pabou a subi riba e rotonde y sali bandi pariba door di e matanan. Aki ta caminda e auto no por a sigui core mas y a keda para mira riba e acera.
Na momento cu e polis a acerca e auto a bin topa cu e chauffeur herida drumi riba e acera banda di su auto. Mesora a pidi pa presencia di mas patruya pa cera e caminda y tambe pa presencia di ambulance. Polis di trafico tambe a wordo pidi na e sitio pa mas investigacion.
Na yegada di ambulance nan a trata e chauffeur y despues a transport’e pa hospital pa un tratamento mas avansa.
No ta conoci si alcohol lo por a hunga un rol den e accidente aki tambe.
