Home Corte Fiscal ta pidi 3 aña di castigo di prison, pa homber cu...

Fiscal ta pidi 3 aña di castigo di prison, pa homber cu a abusa di un mucha muher di 9 aña

SHARE

Oranjestad: Diabierna den oranan di mainta e Homber Arubiano di inicial O. di 26 aña, ta wordo acusa di a abusa di un mucha muher di 9 aña. E abuso sexual a tuma lugar entre 1 di December 2020 y 24 di Februari 2021.

E homber a haci actonan inmoral cu e mucha y a laga e mucha hunga cu su parti intimo tambe.

Hues a puntra O. si e acusacionnan ta berdad. E la admiti y a bisa cu tur cos a sosode na O. su cas. Hues a bisa cu e mucha a bisa cu e abuso a sosode diferente biaha. O. na su turno a bisa Hues cu den pasado e tabata victima di abuso y ta hayando ayudo psycologo pa esaki.

Segun e homber, e tabata usa marihuana y esaki a pone cu e no por a controla su mes. E victima den compania di su mama tabata presente den sala di Corte y por a mira cu na momento cu O. tabata papia di tabata bou influencia di marihuana, e mama di e victima tabata sacudi cabes indicando cu no ta asina.

Fiscal a bisa Hues cu e ta haya legalmente prueba cu O. a haci actonan inmoral cu un mucha menor.

Pa cu e exigencia di castigo, Fiscal a tene na cuenta cu e raport di psycologo y Reclassering. E raportnan ta mustra cu O. mester di ayudo y guia. Tambe cu ta prome biaha cu O. a haci esaki.
Desde aña pasa a aumenta castigo pa casonan di inmoralidad y Fiscal a tene cuenta cu e aumento di castigo tambe.

Fiscal a exigi 3 aña di castigo di prison, di cual 6 luna ta condicional cu 3 aña di prueba, cu condicion special na e castigo, cu e mester bay cay bou guia di reclassering

Dia 22 di september proximo Hues lo dicta sentencia.