Home » Durante e parada di celebracion, e selecion di Aruba Girls U14 y Boys U15 a wordo ricibi na Bestuurskantoor pa Gobierno di Aruba y despues a sigui un fiesta na Drive-In

Durante e parada di celebracion, e selecion di Aruba Girls U14 y Boys U15 a wordo ricibi na Bestuurskantoor pa Gobierno di Aruba y despues a sigui un fiesta na Drive-In

by Admin
0 comment 62 views

Diamars den oranan di atardi, for di oficina di Arubaanse Voetbal Bond a sali un bus, cu e atletanan di futbol di selecion di Aruba Girls U14 y Boys U15. Nan a wordo acompanja pa e Presidente di A.V.B. Sr. Randolf Lacle y tambe sigui pa un cantidad di auto di mayornan y famia.

E parada aki tabata parti di e celebracion pa Aruba su selecion di futbol di girls U14 cu a bira campeon y Boys U15 cu a bira sub campeon na Republica Dominicana siman pasa.

E parada a sali for di A.V.B. na Centro Deportivo Frans Figaroa y despues a pasa den Tanki Flip, Ponton bay Oranjestad, direccion di bestuurskantoor. Dilanti di bestuurskantoor, Gobierno di Aruba tabata wardando nan yegada y aki a tene un ceremonia special.

Prome Minister Evelyn Wever-Croes a ricibi nos atletanan, e la felicitanan y a gradicinan pa pone Aruba su nomber asina halto den deporte mundialmente. Na e ceremonia tabata presente, Minister Dangui Oduber, Minister Xiomara Maduro,
Ursell Arends y Raymond Kamperveen di Partido RAIZ, Darlaine Guedez Erasmus di Partido MEP.

Prome cu nan a sigui cu nan parada, cada un di nos atletanan a ricibi un medaya di Embahador di Aruba. Gobierno di Aruba, den nomber di pueblo en general a felicita y gradici nos atletanan
hoben cu nan logro.

Despues e parada a sigui rumbo Drive-In, nan a pasa den Wayaca, bay Santa Cruz y asina a yega Drive-In. Na Drive-In tabata tin un cantidad di auto y personanan wardando yegada di e parada.

Aki ta caminda e celebracion a sigui, e Presidente di A.V.B. Sr. Randolf Lacle a hiba palabra y a yama cada un di e atletanan riba stage. E atletanan cada uno a ricibi un medaya di A.V.B. como gradicimento pa e logro grandi aki den e mundo di futbol.  Tambe cada selecion a haya un copa for di A.V.B.

Sin mas e celebracion no por tabata mas completo, cu e entretenimiento di Ataniro y dj Sky. Nos atletanan hunto cu Ataniro a baila riba stage y a goza hopi di nan atardi special .

E mayornan y demas famia y amigonan di e atletanan tambe a goza di e atardi di celebracion aki. Despues di un treat, nos atletanan por a bay cas contento cu e atencion hopi special cu nan a ricibi di Gobierno di Aruba y di A.V.B.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio