E prome lider di MEP femenino. E prome Minister President Femenino di Aruba. E prome votegetter femenino di Aruba den eleccion 2021
Lider di MEP Evelyn Wever – Croes a keda asombra y agradecido pa e muestra di aprecio ricibi for di henter e famia di MEP diaranson anochi. Durante un encuentro chikito pa tene cuenta cu reglanan di Covid, Partido a sorprende e Lider di MEP cu un bunita regalo en conexion cu su 10 aña como lider di MEP. Primeramente el a gradici Dios pa tur cos y a enfatisa cu e trabou di lider no ta uno cu un persona por haci su so, e ta un trabou di ekipo. Wever – Croes, na mes momento, a haci uzo di e oportunidad pa duna palabranan di gradicimento na cada un colega cu den bon tempo of mal tempo a para hunto y a hiba e partido dilanti.
Sra Wever-Croes a duna di conoce cu tur cos a cuminsa cu e vision di nos lider honorario Nel Oduber cu a pidi’e pa drenta den politica na 2009. Nel a fungi como lider pa 25 aña cual el a haci den un forma sublime, logrando ta 4 biaha Prome Minister di Aruba.
Na 2011, 28 di augustus, Wever – Croes a asumi e reto pa lidera Partido MEP. Durante e periodo aki, tur miembro mester a custuma cu Nel no tey mas y tambe cu e estilo di liderazgo di Wever – Croes como e prome Lider di MEP femenino, lo ta diferente.
“Awor por wak bek na 10 aña cu hopi reto, pero tambe yena cu momentonan bunita, danki na cada colega cu a yuda pa hiba e Partido dilanti, haciendo MEP e Partido di mas grandi na Aruba”.
Despues di eleccion 2017, Evelyn Wever-Croes a bira e prome Minister President femenino di Aruba. Den e prome periodo di Gobierno di MEP, a logra cosnan grandi pa Aruba, ta p’esey a gana eleccion y pueblo a expresa e gratitud den e votonan haciendo Premier Wever – Croes e prome votegetter femenino di Aruba.
Lider di MEP, Prome Minister di nos pais a expresa cu locual cu pueblo por spera den e di dos periodo di Gobernacion ta cu MEP lo sigui cu e trabou duro y logra cosnan mas grandi ainda pa Aruba.
“Mi ta gradici sostenedornan di Partido MEP, mi votadornan y pueblo di Aruba en general. 10 aña como Lider di un Partido grandi manera Partido MEP, no tawata facil. Pero boso sosten ta duna mi forsa pa lanta tur dia y traha pa sirbi mi pais den e miho forma cu mi por. Masha danki na cada un di boso”.
Lider di MEP y nos prome Minister President Femenino a termina dunando danki na henter Team Evelyn pa e sosten di semper. A pasa den 4 eleccion hunto di cual 3 como lider di partido, na unda varios biaha mester a pone campaña un banda, pa campaña di partido. A gradici henter e team pa kere den su persona, pa yuda y pa duna animo ora cu tin mester di esaki. Por wak bek y bisa cu hunto a logra, y hunto lo sigui logra cosnan mas grandi pa MEP y pa Aruba!
Parlamentario y Presidente di Partido MEP, sr. Hendrik Tevreden a entrega Lider di MEP un bunita recuerdo cu e bunita palabranan graba: ‘Pabien. 10 aña Lider di MEP. E prome lider di MEP femenino. E prome Minister President Femenino di Aruba. E prome votegetter femenino di Aruba den eleccion 2021. Danki pa e amor y pasenshi cu bo ta demostra pa guia nos partido y pa goberna Aruba’.
