Home Corte Dialuna Hof  lo dicidi si Eugene Lampe ta haya libertad condicional awor of...

Dialuna Hof  lo dicidi si Eugene Lampe ta haya libertad condicional awor of na November 2021

SHARE

ORANJESTAD – Awe merdia Hof di Corte Superior a trata e protesta di Eugene Lampe contra e decision di Minister di Husticia pa pospone su libertad condicional cu mester tabata 5 Augustus 2021 pa November 2021.

Aruba Native por a compronde cu Eugene Lampe a wordo treci di KIA pa Corte caminda Hof di Corte Superior a trata e caso.

Hof a mustra cu Minister di Husticia a dicidi di pospone e libertad condicional pasobra e kier tin un plan completo pa sa con ta bay atende cu Eugene Lampe ora e haya su libertad condicional. Eugene Lampe a bisa Hof cu e kier haya su libertad condicional awor. E ta haya cu nan ta laat pa cuminsa awor cu investigacion. El a pidi Hof pa lag’e bay Respaldo tanten cu psychiater ta traha e plan. Eugene a bisa Hof cu el a comporta su mes bon y ta hayando tratamento den KIA.

Eugene Lampe dia 17 Juli 2009 a wordo condena na 18 aña di prison pa a asesina na forma cruel su famia. El a apela e sentencia y Corte Superior a subi e castigo na 20 aña di prison.

Hof a mustra cu Minister Husticia ta haya cu mester haci investigacion promer cu laga Eugene liber. PG a bisa cu el a papia cu un psychiater di Curacao pa haci un evaluacion y prepara un plan di tratamento.

Mr. Lejuez a bisa Hof cu promer Minister di Husticia a pone 3 condicion pa Eugene Lampe lo por haya libertad condicional. E promer condicion ta tratamento. Eugene a bisa cu pa añas e ta bou tratamento di un psychiater. E di dos ta cu e mester ta bou tratamento di diferente psychiater. E di tres ta cu mester tin palabracionnan concreto cu Reclasering. Tur esakinan Eugene a bay di acuerdo. E ta dispuesto pa keda den contacto cu Reclasering. Pa mas cu 6 aña (cu ta e periodo di libertad condicional) e lo mester keda mantene e condicionnan aki. E abogado a bisa Hof cu Eugene no ta di acuerdo cu e mester keda warda. E kier pa e bay liber awor y no te 3 November 2021.

Hof a bisa cu lo bay evalua e caso y mas pronto posibel, mas tarda dialuna, lo tin un decision.