Home » CARLISA TRINIDAD A CUMPLI 25 ANIVERSARIO DEN SERVICIO DI GOBIERNO

CARLISA TRINIDAD A CUMPLI 25 ANIVERSARIO DEN SERVICIO DI GOBIERNO

by Admin
0 comment 101 views

ORANJESTAD – Awe mainta Minister di Cultura Sra. Xiomara Maduro a ricibi Sra. Carlisa Trinidad kende dia 1 di september a cumpli 25 aña trahando na Monumentenbureau. 

 

Carlisa ta di dos empleado cu a cuminsa na Monumentenbureau cu tambe a cumpli 25 aniversario na comienso di e aña aki. E tempo ey Monumentenbureau a cuminsa den un espacio chikito den Centro Educativo Cristian y despues a muda pa Maria Convent den e hala na Dominicanessestraat, sigui pa Zoutmanstraat 1 y ultimamente ta na Schelpstraat caminda Monumentenbureau ta ubica actualmente. Lisa a experiencia tur e mudansanan aki paso e tabata tey for di comienso di Monumentenbureau y a traha semper na e instancia gubernamental aki.

 

Carlisa of Lisa manera e ta wordo yama a cuminsa como ‘administratieve medewerker’ na aña 1996 y tabata encarga cu administracion y tambe e tabata asisti cu asuntonan di e Director. E tempo ey Monumentenbureau tabatin tres persona den servicio y Lisa tabata haci varios otro tarea.

 

Monumentenbureau a crece durante añanan y asina tambe e tareanan. Na aña 2013, Monumentenbureau a wordo restructura y a bira un departamento y Lisa ta haya e funcion nobo di ‘Bureau Manager’ y ela bira Hefe di e departamento di ‘Algemene Zaken’ di Monumentenbureau.

 

Lisa ta conoci pa su coleganan como un persona keto, integro, loyal y hopi stima pa tur su coleganan. Un persona cu semper ta corecto y tambe e conoce tur procedura administrativo di Gobierno.  

 

Minister Xiomara Maduro a gradici Lisa pa su 25 añanan trahando na Monumentenbureau, danki pa tur e aporte, dedicacion duna na e trabou na bienestar di Pais Aruba.

 

Den presencia di mayornan di Carlisa Trinidad y sra. Yvonne Webb, directora di Monumentenbureau, Minister Xiomara Maduro den nomber di Gobierno di Aruba a entrega na Lisa, e Decreto Gubernamental y un recuerdo pa conmemora e aniversario importante aki.

 

Lisa, un biaha mas masha Pabien y nos ta spera cu nos por celebra mas aniversario hunto.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio