Home » Prome Minister Evelyn Wever-Croes: Den un ceremonia special na Bestuurskantoor, GOBIERNO DI ARUBA TA FELICITA NOS ATLETANAN GIRLS U14 Y BOYS U15 

Prome Minister Evelyn Wever-Croes: Den un ceremonia special na Bestuurskantoor, GOBIERNO DI ARUBA TA FELICITA NOS ATLETANAN GIRLS U14 Y BOYS U15 

by Admin
0 comment 38 views

Diamars atardi, Gobierno di Aruba, den un ceremonia special, a honra e atletanan mucha homber y mucha muhe cu dialuna atardi a regresa Aruba cu titulo Sub Campion y Campion den e campionato CFU Challenge Series 2021. E seleccion di Aruba Boys U15 a bira Sub Campion y e seleccion di Aruba Girls U14 a bira Campion.

 

Dilanti di Bestuurskantoor, den nomber di Gobierno di Aruba, Prome Minister Evelyn Wever-Croes a ricibi nos atletanan pa duna nan danki pa a pone Aruba su nomber na halto den deporte mundialmente. Presente tawata, Minister Dangui Oduber, Minister Xiomara Maduro, Ursell Arends y Raymond Kamperveen di Partido RAIZ, Darlaine Guedes Erasmus di Partido MEP y Randolf Lacle, Presidente di Aruba Voetball Bond.

 

Prome Minister a hiba palabra den e ceremonia enfatisando su sentimento di orguyo den nos muchanan especialmente pasobra nos atletanan tawata esunnan cu mas disciplina durante nan experiencia na Republica Dominicana. 

 

“Pa mi ta un orguyo di ta para dilanti di boso pa felicita y bisa boso danki. Loke cu boso a haci ta algo grandi. Cada atleta cu ta representa Aruba den exterior ta haci algo grandi. E ta bira un embahador di Aruba. Y esaki Gobierno di Aruba ta tene cuenta cu ne. Pa e motibo aki tambe ora mi a tende cu boso nan, nos atletanan di Aruba tawata esunnan mas disciplina durante e torneo, mi ta mas orguyoso di boso ainda”, Prome Minister a expresa cu orguyo.

 

Prome Minister a expresa cu loke cu nos atletanan hoben a desplega na Repuplica Dominicana tawata inmenso. Mientras Prome Minister no por a wak tur e weganan, pero si tawata al tanto di e resultadonan, el a wak final di e Campeonato si y a disfruta y a wak nos hobennan bira campeon y sub campion.

 

“Boso a haci un tremendo trabou. E tawata un placer pa wak boso hunga. Mi ta hopi orguyoso di boso cada un. Danki na boso tur. Danki na e entrenadornan, na mayornan y na tur esnan cu a sostene nos atletanan cu a bin cas cu e titulonan aki pa nos pais”.

 

Na final, Cada atleta, bisti den nan bunita uniform, a ricibi un medaya di Embahador di Aruba. Gobierno di Aruba, den nomber di pueblo en general, ta felicita y gradici nos atletanan hoben cu nan logro. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio