E recorte salarial ta conta pa tur empleado di gobierno y no solamente pa maestronan di scol
Mike Eman un biaha mas pone su mes disponibel pa gaña y manipula cu cifras den un tempo na unda cu mester fomenta mas union pa nos pais por recupera mas lihe. Manipulacion cu cifras y troce informacion tawata algo hopi comun pa Partido AVP den nan 8 ultimo añanan di gobernacion bou liderazgo di Eman.
Partido MEP a tuma nota di un articulo di corant di sr. Eman cu e titulo “Recorte salarial di maestronan di scol ta espantoso” na unda cu sr. Eman ta informa cu cifranan manipula y dunando tambe informacion incorecto cu logicamente no ta cuadra cu informacion di Departamento di Recurso Humano.
Pa cuminsa, e recorte salarial ta conta pa tur empleado di gobierno y no solamente pa maestronan di scol.
Sr Eman a haci un comparacion entre loonopgaaf 2019 y loonopgaaf 2020. E comparacion aki no por wordo uza como indicador di e recorte di 12.6% riba un grupo. Esaki pasobra cu cada loonopgaaf ta basá riba e situacion specifico di e persona en cuestion. Banda di esaki e recorte salarial a drenta na vigor na mei 2020 mienras e loonopgaaf ta cubri full un aña.
E “Bruto loon” menciona riba e Loonopgaaf ta e salario primario incluyendo tur componente di salario secundario den placa. Den otro palabra bezoldiging, incluyendo e.o. compensatietoeslagen, vakantie-uitkering, vaste toelagen, variabele toelagen y taak-/ overuren.
E recorte di 12,6% ta riba bezoldiging, compensatietoeslagen y vakantie-uitkering so. Na momento cu e “Bruto loon” ta consisti di otro componentenan of e persona a ricibi den 2019 un pago retroactivo, e diferencia aki lo wordo amplifica.
Un cambio den un “zuiver voljaarsloon”, cual ta wordo compara den e articulo di sr. Eman, ta varia mas ainda como cu aki ta tuma e “aftrekbare bedragen” como tambe kinderaftrek y “beschikking vermindering loon” den e conteo. Cual ta indica mas ainda cu ta comparando “appels met peren”.
Riba e casonan specifico, menciona den e articulo den corant, por remarca lo siguiente:
• Un di e maestronan probablemente no tin salario di of no ta fungi como docente, mirando cu riba e loonopgaaf ta menciona Land Aruba como inhoudingsplichtige y no Dienst Publieke Scholen.
• E mesun persona aki tin alabes un “beschikking vermindering loon” cual ta afecta e diferencia di “zuiver voljaarsloon”. Como tal no por concluí cu e diferencia ta bin solamente door di e recorte di 12.6%.
• Por ultimo ta nota cu den un di e maestranan, e grandura di e diferencia probablemente ta wordo amplifica door di pagonan retroactivo cu a wordo ricibi den 2019. Esaki como cu e diferencia den e “Bruto loon” ta mas halto cu e diferencia den “zuiver voljaarsloon”.
- Por conclui tambe, cu Eman refiriendo y mustrando Loonopgave di personanan cu a trahe pe ter beschikking den su gabinete, activististanan di AVP pa hustifica su manipulacion.
Partido MEP, ta di opinion cu Aruba merece politiconan cu ta traha serio y honesto, sin tin mester di recuri na manipulacion di cifra y informacion pa prueba nan sed pa yega na poder.