Home Corte Caso IBIS, lo sigui dia 21 di September 2021

Caso IBIS, lo sigui dia 21 di September 2021

SHARE

Oranjestad: Diaranson den careda di 6’or di atardi, Hof a pospone e tratamento di e caso IBIS, te dia 21 di september, cual ta e fecha cu Hof lo ta bek na Aruba.

Manera nos tur sa, dialuna a cuminsa cu e tratamento di e caso IBIS den Corte Superior. Tabata tres dia basta pisa pa e sospechosonan, e sospechoso principal Paul Croes, su señora Melony Paesch Croes, a apela despues di no tabata di acuerdo cu e sentencia di Corte di Prome Instancia, na februari 2019.

Ministerio Publico tambe a dicidi di apela mirando cu nan no tabata di acuerdo cu e sentencia cu algun di e sospechosonan a ricibi den Corte di Prome Instancia. Tabata trata di Sr. Wever, Sr. Di Vecchia, Sra. Martinus y Ninosca Werleman Nuñez, casa di Gaby Werleman, Gaby ta un ex candidato di AVP, un persona hopi prominente di e partido berde. Mester bisa cu e sentencia di caso Ibis  no ta e unico, paso Sra. Werleman Nuñez ta un sospechoso tambe di e caso Avestruz, cual caso ta pendiente pa bay wordo trata den corte.

Un di e motibo pakiko Hof a pospone e caso, tabata pasobra durante tratamento di e caso diaranson, e abogado defensor mr. Illes a entrega na Hof un map cu ta contene splicacion di e entradanan di Melony y Paul.

Posponiendo e caso ta duna Procurador General chens pa studia e informacion cu tin den e map, cu su persona no tabata na altura di dje. Dia 21 di September proximo Hof lo ta na Aruba bek y lo kier scucha reacion di Procurador General y tambe di e abogado defensor.