148
Diabierna mainta nos Miss Universe Aruba, Thessaly Zimmerman, a tene un rueda di prensa pa splica mas tocante su campaña cu e ta hiba pa promocioná e plataforma di Salud Mental. Esaki alavez ta e plataforma cu Thessaly a escohe y ta boga p’e, durante e competencia di Miss Universe 2021, cual lo tuma lugar na December di e aña aki, na Eilat, Israel.
Srta Zimmerman a anuncia su colaboracion cu diferente stakeholders den e tereno di cuido di salud mental y adiccion. Mirando cu tur aña riba dia 10 di October ta dia Mundial di Salud Mental (World Mental Healtg Day) a bin cu e idea pa hunto organisa algo pa e comunidad di Aruba. E tema di di dia Mundial di Salud Mental pa e aña aki ta *”Mental Health in an Unequal World”*, esta Salud Mental den un Mundo Inigual. Asina a nace e idea pa organisa un actividad cu ta ofrece tur hende e oportunidad di participa y alavez ricibi informacion valioso entorno salud mental. A pensa di promove e aña aki e uso di arte, como herment pa yuda cu salud mental. Manera ta conoci, arte ta wordo usa den diferente forma, den e cuadro di cuido di salud mental. Di e forma aki, ta haci uso di arte pa procesa y expresa sentimientonan, pero tambe por usa arte como metodo pa relaha, y cope cu entre otro ansiedad y stress. Esaki a hiba na e feria cu lo tuma lugar dia 23 di October bao nomber di *”Let’s Art About Mental Health”*. Durante e feria aki, lo tin diferente art workshops cu por asisti, lo tin artesano y artistanan presebte y mucho mas. Igual lo tin oportunidad pa tur dunado di cuido den salud mental, pa ta presente y ofrece informacion y asina duna Aruba un bista completo di e diferente servicionan disponibel na Aruba.
Cu esaki ta haci un llamado na tur artesano y artista na Aruba cu kier participa na e feria unico aki, pa manda un email na [email protected] pa mas informacion of tuma contacto cu 6992007.
Ta gradici tu stakeholders cu ta para tras di e projecto aki y ta aplaudi e iniciativa di tur e partidonan aki, pa traha hunto y haci esaki posibel:
* Atelier ’89 Punto de Bellas Artes
* Fundacion Salud Mental Aruba (RESPALDO)
* Sociaal Psychiatrische Dienst (SPD)
* Fundacion di Maneho di Adiccion Aruba (FMAA)
* Cosecha Aruba
* FADA
*Jordan Ling Foundation
* Plataforma Promocion di Salud, consistiendo di e siguiente plataformanan;
° AZV
° ImSan,
° IbiSa
° Witgele Kruis (WGK)
° Horacio Oduber Hospitaal (HOH)
° SVB
° DVG
° Dr di Cas Sharline Vis.
Pa mas informacion over *”Let’s Art about Mental Health* por follow e facebook page cu lo wordo lansa awe